काठमाडौं : सुनसरीको देवानगन्ज गाउँपालिकालगायत क्षेत्रमा उत्पन्न तनावपूर्ण अवस्थाप्रति राष्ट्रपति, पूर्वराष्ट्रपति, प्रमुख राजनीतिक दल, नागरिक समाज, व्यावसायिक संस्था तथा विभिन्न सरोकारवालाले गम्भीर चासो व्यक्त गर्दै सामाजिक सद्भाव, सहिष्णुता र राष्ट्रिय एकता कायम राख्न संयुक्त रूपमा अपिल गरेका छन्।
राष्ट्रपति रामचन्द्र पौडेलसहित विभिन्न राजनीतिक नेतृत्वले जारी गरेको अपिलमा नेपालमा सदियौँदेखि कायम रहँदै आएको धार्मिक, जातीय तथा सामाजिक सद्भावलाई कुनै पनि परिस्थितिमा कमजोर हुन नदिन सबै पक्षलाई संयम अपनाउन आग्रह गरिएको छ। अपिलमा वर्तमान विषम अवस्थालाई यथाशीघ्र सामान्य बनाउँदै शान्ति–सुरक्षा पुनःस्थापित गर्न सरकार सफल हुने विश्वास व्यक्त गरिएको छ।
साथै, घटनाको निष्पक्ष छानबिन गरी दोषीमाथि कानुनबमोजिम कडा कारबाही गर्न तथा भविष्यमा यस्ता घटना दोहोरिन नदिन सबै सरोकारवालालाई जिम्मेवार भूमिका निर्वाह गर्न आह्वान गरिएको छ।
पूर्वराष्ट्रपति र पूर्वप्रधानमन्त्रीको पनि संयमताको आग्रह
पूर्वराष्ट्रपति विद्यादेवी भण्डारीले सुनसरी र सिराहालगायत क्षेत्रमा भएका हिंसात्मक घटनाप्रति दुःख व्यक्त गर्दै सामाजिक सद्भाव कायम राख्न सबैलाई आग्रह गरेकी छन्। उनले संकटको घडीमा राजनीतिक दलहरूले संवादको पहल गर्नु सकारात्मक भएको उल्लेख गरेकी छन्।
पूर्वप्रधानमन्त्री तथा नेकपा (एमाले) का अध्यक्ष केपी शर्मा ओलीले पनि देशका विभिन्न स्थानमा देखिएका तनावपूर्ण घटनालाई थप जटिल बन्न नदिन नागरिक, राजनीतिक दल र सरोकारवाला सबैले संयमता अपनाउनुपर्ने बताएका छन्। उनले हिंसाको सट्टा संवाद र सहमतिबाट समस्याको समाधान खोज्नुपर्ने धारणा व्यक्त गरेका छन्।
पूर्वराजा, नागरिक समाज र राजनीतिक दलको साझा स्वर
पूर्वराजा ज्ञानेन्द्र शाहले विज्ञप्तिमार्फत देवानगन्ज घटनापछि सामाजिक द्वन्द्व बढेकोप्रति दुःख व्यक्त गर्दै विभिन्न समुदायबीचको ऐतिहासिक सद्भाव जोगाउन सबैलाई जिम्मेवार बन्न आग्रह गरेका छन्।
नागरिक अगुवा नीलाम्बर आचार्यले कर्फ्यू वा सुरक्षा व्यवस्थामात्र दीर्घकालीन समाधान नभएको उल्लेख गर्दै राजनीतिक संवादमार्फत समस्याको निकास खोज्न सरकार र राजनीतिक नेतृत्वको ध्यानाकर्षण गराएका छन्।
जेनजी अभियानका अगुवा रक्षा बम, माजिद अन्सारी र रामजी रामलगायतले पनि सामाजिक सद्भाव र सहिष्णुता कायम राख्न आह्वान गरेका छन्।
उज्यालो नेपाल पार्टी तथा मधेशकेन्द्रित दलहरू—जनता समाजवादी पार्टी, राष्ट्रिय मुक्ति पार्टी नेपाल, जनमत पार्टी र राष्ट्रिय निर्माण पार्टी—ले पनि सर्वपक्षीय संवादमार्फत समस्या समाधान, निष्पक्ष छानबिन र पीडितलाई न्याय दिलाउन माग गरेका छन्।
नेपाल बार र उद्योग वाणिज्य महासंघको पहल
यसैबीच, नेपाल बार एसोसिएसनले घटनाको सत्यतथ्य पत्ता लगाउन उपाध्यक्ष पदमप्रसाद लिम्बूको संयोजकत्वमा नागरिकस्तरीय अध्ययन समिति गठन गरेको छ। समितिले घटनाको अनुसन्धान गरी प्रतिवेदन सार्वजनिक गर्ने जनाएको छ।
त्यसैगरी, नेपाल उद्योग वाणिज्य महासंघ (FNCCI) ले कुनै पनि मतभेद वा असमझदारीको समाधान वार्ता, संवाद र आपसी समझदारीबाट मात्रै सम्भव हुने उल्लेख गर्दै हिंसा, झडप र सामाजिक अशान्तिले मुलुकको आर्थिक तथा सामाजिक वातावरणमा नकारात्मक असर पर्ने चेतावनी दिएको छ।
मधेश सरकारको पनि शान्तिको आह्वान
मधेश सरकारले समेत सबै पक्षलाई संयमता अपनाउँदै शान्ति, सामाजिक सद्भाव र कानुनी शासनको पक्षमा उभिन आग्रह गरेको छ। सरकारले घटनाको निष्पक्ष अनुसन्धान, दोषीलाई कारबाही तथा समुदायबीचको विश्वास पुनःस्थापनाका लागि आवश्यक पहल गर्ने प्रतिबद्धता जनाएको छ।
देवानगन्ज घटनापछि मुलुकका प्रमुख राजनीतिक, संवैधानिक, नागरिक तथा व्यावसायिक क्षेत्रबाट आएको साझा सन्देशले कुनै पनि विवादको समाधान हिंसाबाट होइन, संवाद, सहिष्णुता र राष्ट्रिय एकताबाट मात्रै सम्भव हुनेमा जोड दिएको छ।
