काठमाडौं। नेपाली महिला राष्ट्रिय फुटबल टोलीका खेलाडीहरू STC Ride र STC Energy को ब्रान्ड एम्बासेडर नियुक्त भएका छन।

स्वदेशमै उत्पादन हुँदै आएका ब्याट्री ब्रान्डहरू STC Ride तथा STC Energy ले नेपाली खेलकुद क्षेत्रसँगको सहकार्यलाई थप सुदृढ बनाउने उद्देश्यसहित नेपाली महिला राष्ट्रिय फुटबल टोलीका तीन खेलाडीलाई आफ्नो आधिकारिक ब्रान्ड एम्बासेडरको रूपमा नियुक्त गरेको छ।

मिति २०८३ जेठ ६ गते, सोमबार अखिल नेपाल फुटबल सङ्घ (ANFA) परिसरमा आयोजित विशेष साइनिङ समारोह मार्फत राष्ट्रिय महिला फुटबल टोलीका चर्चित खेलाडीहरू रेखा पौडेल, मनमाया दमाई तथा दीपा शाहीसँग औपचारिक सम्झौता सम्पन्न गरिएको हो।

सम्झौता अनुसार राष्ट्रिय टोलीकी फरवार्ड खेलाडी रेखा पौडेल तथा प्रतिभाशाली युवा खेलाडी दीपा शाहीले STC Ride को प्रतिनिधित्व गर्नेछन् भने राष्ट्रिय टोलीसँग आबद्ध खेलाडी मनमाया दमाईलाई STC Energy को ब्रान्ड एम्बासेडरको रूपमा अनुबन्ध गरिएको छ।

नेपाली महिला राष्ट्रिय फुटबल टोलीकी रेखा पौडेल, दीपा शाही र मनमाया दमाईले घरेलु तथा अन्तर्राष्ट्रिय प्रतियोगिताहरूमा निरन्तर उत्कृष्ट प्रदर्शन गर्दै नेपाली महिला फुटबलको उन्नयनमा महत्त्वपूर्ण योगदान दिइरहेका छन्। अनुभव, उदाउँदो प्रतिभा र निरन्तर समर्पणका साथ यी तीनै खेलाडीहरूले नेपाली फुटबललाई अन्तर्राष्ट्रिय स्तरमा चिनाउन उल्लेखनीय भूमिका निर्वाह गर्दै आएका छन्।

नेपालको अटोमोटिभ तथा ऊर्जा क्षेत्रमा सक्रिय श्री एसटीसी ग्रुप (Shree STC Group) ले विगत लामो समयदेखि गुणस्तरीय तथा भरपर्दो ऊर्जा समाधान उपलब्ध गराउँदै आएको छ। कम्पनीले आधुनिक प्रविधिमा आधारित ब्याट्री उत्पादन मार्फत नेपाली बजारमा आफ्नो विश्वसनीय पहिचान स्थापित गरेको छ।

कम्पनीका प्रमुख उत्पादनहरू STC Ride तथा STC Energy पूर्ण रूपमा Made in Nepal ब्याट्री ब्रान्डहरू हुन्। नेपाली सडक, मौसम तथा उपभोक्ताको आवश्यकता अनुसार स्वदेशमै उत्पादन गरिएका यी ब्याट्रीहरूले उच्च कार्यक्षमता, लामो आयु तथा भरपर्दो प्रदर्शन प्रदान गर्दै आएका छन्। विशेषगरी दुई पाङ्ग्रे, चार पाङ्ग्रे तथा ऊर्जा र पावर ब्याकअप क्षेत्रमा आफ्नो प्रभाव तथा लोकप्रियता बन्दै गइरहेको कम्पनीले जनाएको छ।

कार्यक्रममा बोल्दै एसटीसी ग्रुपका प्रबन्ध निर्देशक र नाडा अटोमोबाइल्स एसोसिएसन अफ नेपाल (NADA) का अध्यक्ष सुरेन्द्र कुमार उप्रेतीज्यूले नेपाली खेलाडीहरूसँग सहकार्य गर्न पाउँदा गर्व महसुस भएको बताउनुभएको थियो। कम्पनीले खेलकुद क्षेत्र र युवा पुस्तालाई प्रोत्साहन गर्ने उद्देश्यले राष्ट्रिय खेलाडीहरूसँग सहकार्य गरिएको उल्लेख गर्दै आगामी दिनहरूमा पनि नेपाली प्रतिभालाई निरन्तर समर्थन गर्ने प्रतिबद्धता व्यक्त गरेको छ।

कार्यक्रममा एन्फा (ANFA) का पदाधिकारी, एसटीसी ग्रुपको मार्केटिङ टिम, खेलकुदकर्मी, व्यवसायी, सञ्चारकर्मी तथा विभिन्न क्षेत्रका अतिथिहरूको उल्लेखनीय उपस्थिति रहेको थियो। साइनिङ समारोह उत्साहपूर्ण तथा सौहार्दपूर्ण वातावरणमा सम्पन्न भएको थियो।