काठमाडौं। मुक्तिनाथ विकास बैंकको खराब कर्जा अनुपात आर्थिक वर्ष २०८३/८४ को पहिलो त्रैमासमा बढेर ४.७३ प्रतिशत पुगेको छ। अघिल्लो वर्षको सोही अवधिमा यस्तो अनुपात ४.०३ प्रतिशत थियो।
बैंकको अलेखा परीक्षित वित्तीय विवरणअनुसार खुद खराब कर्जा अनुपात पनि १.३२ प्रतिशतबाट बढेर २.१९ प्रतिशत पुगेको छ। तर कुल खराब कर्जाको तुलनामा नोक्सानी व्यवस्था भने १०२.३८ प्रतिशतबाट घटेर ८३.६७ प्रतिशतमा झरेको छ।
कर्जा तथा अन्य नोक्सानी व्यवस्था खर्च ७५ प्रतिशतले घटेर रु. ५४ करोड १२ लाखबाट रु. १३ करोड ५५ लाखमा सीमित भएको छ। यही खर्चमा आएको ठूलो गिरावटका कारण बैंकको खुद नाफा ४३.४४ प्रतिशतले बढेर रु. ३२ करोड २४ लाख पुगेको छ।
खुद सञ्चालन आम्दानीमा भएको रु. ४७ करोड ६६ लाख वृद्धिमध्ये करिब ८५ प्रतिशत हिस्सा नोक्सानी व्यवस्था खर्च घटेको प्रभावबाट आएको बैंकको विवरणमाथिको गणनाले देखाउँछ। उक्त प्रभाव हटाउँदा सञ्चालन नाफा करिब ३.४ प्रतिशत मात्र बढेको देखिन्छ।
यस अवधिमा ब्याज आम्दानी १०.३ प्रतिशतले घटेर रु. २ अर्ब ३५ करोड ७९ लाखमा झरेको छ भने खुद ब्याज आम्दानी २.७ प्रतिशत मात्र बढेको छ। बैंकको स्प्रेड दर पनि ४.५९ प्रतिशतबाट घटेर ४.३८ प्रतिशतमा झरेको छ।
नाफा बढे पनि नियमनकारी समायोजनपछि बैंकको त्रैमासिक वितरणयोग्य नाफा करिब रु. ६ करोड ऋणात्मक रहेको छ।
असार मसान्तको तुलनामा बैंकको निक्षेप २.२० प्रतिशत र ग्राहक कर्जा ४.९४ प्रतिशतले बढेको छ। प्रतिशेयर आम्दानी रु. ११.२४ बाट बढेर रु. १६.१२ पुगेको छ भने इक्विटीमाथिको प्रतिफल ७.५६ प्रतिशतबाट ९.८४ प्रतिशत पुगेको छ।
बैंकले कर्जा असुलीमा चुनौती र कमजोर कर्जा मागलाई प्रमुख आन्तरिक चुनौतीका रूपमा उल्लेख गरेको छ। सार्वजनिक वित्तीय विवरण अलेखापरीक्षित भएकाले नेपाल राष्ट्र बैंक तथा वैधानिक लेखापरीक्षकको निर्देशनअनुसार तथ्यांकमा परिवर्तन हुन सक्ने बैंकले जनाएको छ।
