काठमाडौं । नेवार समुदायले विशेष महत्वका साथ आज योमरी पुन्ही अर्थात् योमरी पूर्णिमा मनाउँदैछन् ।
नेवार समुदायको विशेष परिकारको रुपमा योमरीलाई लिने गरीन्छ, यसलाई विभिन्न परिकारहरु बनाएर खाने गरिन्छ । योमरी पुन्हीमा तिल, चाकु र खुवा राखेर चामलको पिठोबाट बनाइएको विशेष प्रकारको परिकार योमरी खाने गरिन्छ ।
नेपाल सम्बत् अनुसार थिंलाथ्व पुन्ही अर्थात् मंसिर महिनाको शुक्ल पूर्णिमाका दिन यो पर्व मनाइन्छ । धान्य पूर्णिमाको साँझ टोलटोलमा रमाइलो गर्दै केटाकेटी, युवायुवती जम्मा भई योमरी माग्ने चलन पनि रहीआएको छ ।
आजै नयाँ अन्न राखिएको भकारी एवं भण्डारमा योमरी लगायत लक्ष्मी, गणेश, कुवेर, नांग्लो, सुकुन्दा, कुचो समातेको मान्छे, पानस, कछुवा आदिको मूर्ति सहित चेप्टो सानो सानो पात आकारको ल्होँचामरी बनाई पूजा गरी चढाउने गरिन्छ ।
योमरीलाई भकारी लगायत अन्नका भण्डारमा चढाउँदा धनसम्पति र अन्न लाभ हुने विश्वास गरिन्छ ।
आजकै दिनलाई ज्यापु समुदायले ‘ज्यापु दिवस’का रुपमा पनि मनाउने
आजकै दिनलाई काठमाडौं उपत्यकाका ज्यापु समुदायले ‘ज्यापु दिवस’का रुपमा पनि मनाउने चलन छ ।
‘ज्यापु दिवस’ का अवसरमा नेवाः संस्कृति, बाजागाजा, भेशभूषा आदिलाई जगेर्ना गर्न विभिन्न साँस्कृतिक झाँकी निकाल्ने गरिन्छ । मौलिक बाजा धिमेको तालमा यो अवसरमा निकालिने अद्भुत झाँकीले नेपालभित्र प्रचलनमा रहेकोनेवार समुदायको रैथाने रीतिरिवाज र परम्परालाई जीवन्त राख्न पनि सहयोग गर्दछ । यस्ता पर्वहरुले आउने पुस्ताहरुमा स्थानान्तरणमा पनि सहयोग गर्दछ ।
