काठमाडौं। नेपाल पर्यटन बोर्डको आयोजनामा बुद्धिस्ट इन्टरनेशनल ट्राभल मार्ट (बीआईटीएम) २०२५ सुरु भएको छ।
संस्कृति, पर्यटन तथा नागरिक उड्डयनमन्त्री बद्री प्रसाद पाण्डेले शुक्रबार काठमाडौंमा मार्टको औपचारिक उद्घाटन गरेका हुन् ।
बीआईटीएम(२०२५ उद्घाटन गर्दै मन्त्री पाण्डेले नेपाललाई बौद्ध, आध्यात्म र शान्ति पर्यटनको विश्व केन्द्रको रूपमा स्थापित गरिने विश्वास व्यक्त गरेका छन् । “बुद्धको जन्मभूमि लुम्बिनीबाट सुरु भएको शान्तिको सन्देश आज पुनः नेपालबाटै विश्वभर फैलाउने समय आएको छ,” मन्त्री पाण्डेले भने ।
त्यसैगरी मन्त्री पाण्डेले लुम्बिनीलाई ‘अन्तर्राष्ट्रिय शान्ति शहर’का रुपमा विकास गर्ने समेत बताएका छन् । उनले भने, ‘बुद्धको जन्मस्थल लुम्बिनीलाई अन्तर्राष्ट्रिय शान्ति शहरको रुपमा विकास गर्न सरकार प्रतिबद्ध छ । त्यसैगरी लुम्बिनीमा कपिलवस्तु, रामग्राम, देवदह र तिलौराकोटलगायतका प्रमुख सर्किटमा केन्द्रित हुँदै बौद्ध पर्यटनलाई प्राथमिकता दिइएको छ ।’
मन्त्री पाण्डेले बौद्ध पर्यटन प्रवद्र्धनका लागि गौतमबुद्ध अन्तर्राष्ट्रिय विमानस्थलमा नियमित उडान र सडक सञ्जालको प्रभावकारी पहुँच स्थापित गर्ने काम भइरहेकोसमेत बताएका छन् । मन्त्री पाण्डेले थपे, ‘युनेस्कोका प्रतिनिधिसँगको पछिल्लो संवादलाई उल्लेख गर्दै लुम्बिनीलाई जोखिमयुक्त सूचीमा नराख्न आग्रह गरेका छौं । साथै तिलौराकोटलाई युनेस्कोको सम्भावित सूचीमा समावेश गराउन सरकारले पहल गरिरहेको छ ।’
मन्त्री पाण्डेले मुलुक शान्ति र समृद्धिको नयाँ युगतर्फको यात्राको रहेकाले विश्व शान्तिको चाहना राख्नेलाई नेपाल भ्रमण गर्नसमेत आग्रह गरेका छन् ।
कार्यक्रममा कोशी प्रदेशका उद्योग, पर्यटन तथा वातावरण मन्त्री सडानन्द मण्डलले पनि शुभकामना मन्तव्य राख्दै प्रदेश सरकारले पर्यटकीय पूर्वाधार विकासमा उच्च प्राथमिकता दिएको बताएका छन् ।
बीआईटीएमऔ२०२५ को उद्घाटन समारोहमा बोल्दै नेपाल पर्यटन बोर्डका प्रमुख कार्यकारी अधिकृत (सिईओ) दीपकराज जोशीले नेपाल एक यात्रा गन्तव्य मात्र होइन नभएर अनुभूति भएको बताएका छन् । सीईओ जोशीले नेपाललाई आध्यात्मिक र शान्तीको आधारशीला भएको मुलुकको रूपमा प्रस्तुत गर्दै यसप्रकारको अन्तर्राष्ट्रिय कार्यक्रम साझा प्रतिबद्धता र सार्थक सहकार्यको प्रमाण भएको बताएका छन् ।
उनले भने, ‘नेपाल यात्रा गन्तव्यमा पुग्ने भौगोलिक पथ मात्रै होइन, यो आत्मा र शान्तिको यात्राको प्रारम्भ हो । यहाँको बौद्ध सम्पदा, ध्यान केन्द्र, सांस्कृतिक विविधता र आत्मिक ऊर्जा विदेशी पाहुनाका लागि सधैं सन्देशवाहक बन्न सक्छन् ।” सीईओ जोशीले बीआईटीएमजस्ता प्लेटफर्महरूलाई अन्तर्राष्ट्रिय साझेदारी, दिगो पर्यटन, र आध्यात्मिक पुनर्जागरणको यात्रा आरम्भ गर्ने अवसरका रूपमा चित्रण गरेका छन् । उनले थपे, “नेपाललाई हामी विश्वको सबैभन्दा प्रामाणिक आध्यात्मिक गन्तव्यका रूपमा प्रस्तुत गर्दैछौं । बौद्ध सर्किटजस्ता महत्वपूर्ण योजनाहरूले नेपालको पर्यटनलाई अर्थपूर्ण सम्पर्क र दिगो भविष्य तर्फ डोर्याउने छन् ।’
कार्यकर्ममा नाट्टाका अध्यक्ष कुमारमणि थपलियाले शान्ति र अध्यात्म पर्यटनमा बुद्धिस्ट इन्टरनेश्नल ट्राभल मार्ट उपयोगी बन्ने विश्वास व्यक्त गरेका छन् ।
