ईकोनोमिक खबर, काठमाण्डौं । सिटिजन लाइफ इन्स्योरेन्सले प्रिमियममा आइपीओ जारी गर्ने भएको छ । कम्पनीले आउँदो भदौ १५ गतेदेखि प्रिमियममा आईपीओ निष्काशन गर्ने भएको हो । कम्पनीले सर्वसाधारणलाई प्रतिशेयर १०० रुपैयाँ अङ्कित मूल्यमा १४४ रुपैयाँ प्रिमियम थपगरी कुल २४४ रुपैयाँमा आइपीओ जारी गर्न लागेको हो ।
कम्पनीले आफ्नो जारी पुँजी ३ अर्ब ७५ करोड रुपैयाँको ३० प्रतिशतका दरले हुन आउने १ अर्ब १२ करोड ५० लाख रुपैयाँ बराबरको १ करोड १२ लाख ५० हजार कित्ता शेयर जारी गर्न अनुमति पाएको थियो। सोमध्ये ५ प्रतिशतले हुन आउने ५ करोड ६२ लाख ५० हजार रुपैयाँ बराबरको ५ लाख ६२ हजार ५०० कित्ता प्रति शेयर १०० रुपैयाँमा कम्पनीका कर्मचारीहरूका लागि निष्काशन गरिसकेको छ । र, बाँकी १ अर्ब ६ करोड ८७ लाख ५० हजार रुपैयाँ बराबरको १ करोड ६ लाख ८७ हजार ५०० कित्ता शयरको १० प्रतिशत अर्थात् ११ लाख २५ हजार कित्ता वैदेशिक रोजगारीमा गएका नेपालीका लागि तथा ५ लाख ६२ हजार ५०० कित्ता सामूहिक लगानी कोषहरूका लागि निष्काशन गरी बाँडफाँड गरिसकेको छ ।
कम्पनीले बाँकी रहेको ९० लाख कित्ता शेयर सर्वसाधारणमा निष्काशन गर्न लागेको हो। कम्पनीको आइपीओमा न्यूनतम १० कित्ता देखि अधिकतम १५ लाख कित्तासम्मका लागि आवेदन दिन सकिनेछ । कम्पनीको आइपीओमा भदौ १९ गतेसम्म आवेदन दिन सक्नेछन् । सो अवधिमा पूर्ण आवेदन नपरेको खण्डमा भने भदौ २९ गतेसम्म म्याद थप हुनेछ ।
आईपीओ निष्काशनका लागि गराएको रेटिङमा इक्रा नेपालले कम्पनीलाई इक्राएनपी इस्यूअर रेटिङ त्रिपल बी प्रदान गरेको छ । यसमा कम्पनीको वित्तीय दायित्व समयमा नै पुरा गर्ने सम्बन्धमा मध्यम रूपमा सुरक्षित रहेको सङ्केत गर्दछ। कम्पनीको शयर निष्काशन तथा बिक्री प्रबन्धक एनआइएमबि एस क्यापिटल लिमिटेड रहेको छ ।
