काठमाडौं। बंगालको खाडीमा विकसित न्यून चापीय क्षेत्र शक्तिशाली बन्दै चक्रवातमा परिणत हुने सम्भावना देखिएपछि नेपालमा पनि मौसम प्रभावित हुन सक्ने भन्दै मौसम पूर्वानुमान महाशाखाले सतर्क रहन आग्रह गरेको छ।

नेपाल सरकार, ऊर्जा, जलस्रोत तथा सिँचाइ मन्त्रालयअन्तर्गतको जल तथा मौसम विज्ञान विभागले शुक्रबार राति ७ बजे जारी गरेको ‘पोस्ट–मनसुन विशेष मौसम बुलेटिन–१’ अनुसार बंगालको खाडीको पूर्वमध्य तथा आसपासको दक्षिणपूर्वी क्षेत्रमा न्यून चापीय क्षेत्र विकसित भएको छ।

महाशाखाका अनुसार उक्त प्रणाली क्रमशः शक्तिशाली बन्दै कात्तिक ९ गते (अक्टोबर २६), सोमबारसम्म चक्रवातीय आँधीमा विकसित हुन सक्ने सम्भावना छ। त्यसपछि प्रणाली पश्चिम–उत्तरपश्चिम दिशातर्फ सर्दै भारतको उत्तरी आन्ध्र प्रदेश तथा दक्षिण ओडिशाको आसपासको तटीय क्षेत्रबाट स्थलभागमा प्रवेश गर्न सक्ने पूर्वानुमान गरिएको छ।

कात्तिक ११ देखि नेपालको मौसम प्रभावित हुनसक्ने

उक्त मौसमी प्रणालीको प्रभावले कात्तिक ११ गते (अक्टोबर २८) बुधबारदेखि कात्तिक १५ गते (नोभेम्बर १) आइतबारसम्म नेपालको मौसम प्रभावित हुन सक्ने विभागले जनाएको छ।

यद्यपि, यस प्रणालीका कारण नेपालमा कति वर्षा हुन्छ, कुन क्षेत्रमा बढी असर पर्छ र जोखिमको स्तर कस्तो हुन्छ भन्ने विषयमा अहिले नै यकिन गर्न नसकिने महाशाखाको भनाइ छ।

मौसम प्रणालीको दिशा, गति र तीव्रतामा हुने परिवर्तनका आधारमा नेपालमा पर्ने प्रभाव फरक पर्न सक्ने भएकाले आगामी सूचनालाई महत्त्वका साथ लिनुपर्ने देखिन्छ।

कृषि र पर्यटन क्षेत्रमा असर पर्नसक्ने

सम्भावित प्रतिकूल मौसमका कारण कृषि तथा पर्यटन क्षेत्रमा असर पर्नसक्ने भन्दै विभागले सम्बन्धित सबैलाई सतर्क रहन अनुरोध गरेको छ।