ईकोनोमिक खबर, काठमाण्डौं। मदनपोखरा ७ पाल्पाका कृषि उद्यमी ढकेश्वर घिमिरे जनसेवाश्री पदकबाट सम्मानित हुनुभएको छ। 

स्वदेशमा उत्पादित अर्गानिक कफीको प्रवद्र्धन तथा बजारीकरणमा अनुकरणीय काम गरेको भन्दै सरकारले उहाँलाई जनसेवाश्री पदकबाट सम्मान गरेको हो । शुक्रवार एक विशेष कार्यक्रममा राष्ट्रपति रामचन्द्र पौडेलले जनसेवाश्री पदकबाटसम्मान गर्नुभएको हो । नेपालमा उत्पादित अर्गानिक कफीको बजारीकरणमा घिमिरेको योगदान रहेको छ । घिमिरेले झण्डै ४० वर्षदेखि नेपाली कफीको प्रवद्र्धनमा लागि रहनु भएको छ।

२०४९ मा स्थापना भएको राष्ट्रिय चिया तथा कफी विकास बोर्डको गठनमा घिमिरेको महत्वपूर्ण भूमिका रहेको कृषि क्षेत्रका जानकार बताउँछन् । राष्ट्रको यो सम्मानले आउँदा दिनमा नेपाली कफीको बजारीकरण र उत्पादनमा लाग्नका लागि थप प्रेरणा मिलेको घिमिरेले बताउँनु भयो।

नेपालका ४२ जिल्लामा कफीको उत्पादन हुने गरेको छ । राष्ट्रिय चिया तथा कफी विकास बोर्डका अनुसार नेपालमा करिव ५ सय मेट्रिक टन कफी उत्पादन हुने गरेको छ । विश्व बजारमा नेपाली कफीको माग भएपनि अपेक्षाकृत उत्पादन बढाउन भने सकिएको छैन ।