काठमाडौं । गत आर्थिक वर्षको तुलनामा यस अवधिमा ७५ प्रतिशतभन्दा बढी श्रमिकलाई क्षतिपूर्ति उपलब्ध गराइएको छ। विभागका महानिर्देशक सूर्य बहादुर खत्रीले पदभार सम्हालेको पाँच महिनामा क्षतिपूर्ति वितरण कार्यमा ठुलो उपलब्धि हासिल भएको बताए।
अर्ध वार्षिक कार्य प्रगतिबारे आयोजित पत्रकार सम्मेलनमा उनले चालु आर्थिक वर्षको पुस मसान्तसम्म २४ करोड ६७ लाख रुपैयाँभन्दा बढी क्षतिपूर्ति वितरण गरिएको जानकारी दिए।
यो रकम गत आर्थिक वर्षको सोही अवधिमा वितरण गरिएको १४ करोड ९ लाख रुपैयाँभन्दा धेरै हो। वैदेशिक रोजगार विभागले चालु आर्थिक वर्षको पहिलो छ महिनामा पीडित श्रमिकहरूलाई क्षतिपूर्ति वितरणमा उल्लेखनीय प्रगति गरेको छ।
उनका अनुसार, साउनदेखि पुससम्म विभागमा ३,४०५ वटा वैदेशिक रोजगार सम्बन्धी ठगीका उजुरी दर्ता भएका थिए। तीमध्ये १,२३० उजुरीको समाधान गरिएको छ।
खत्रीले पीडितलाई शीघ्र न्याय र आर्थिक सहायता उपलब्ध गराउन विभागले विशेष प्राथमिकता दिएको बताए।
विभागले क्षतिपूर्ति वितरण प्रक्रियालाई थप प्रभावकारी बनाउँदै पीडितहरूको राहतमा सकारात्मक कदम चालेको छ।
