काठमाडौं । साताको अन्तिम कारोबार दिन नेपाल स्टक एक्सचेञ्ज (नेप्से) परिसूचक दोहोरो अंकले घटेको छ। बिहीबार नेप्से १०.६७ अंक अर्थात् ०.४० प्रतिशतले घटेर २,६१८.७२ विन्दुमा बन्द भएको हो।

यसअघि अघिल्लो कारोबार दिन नेप्से ७.१७ अंकले बढेको थियो। बिहीबार बजार २,६२६.०७ विन्दुबाट खुलेको थियो। कारोबारका क्रममा नेप्से अधिकतम २,६३१.२८ विन्दुसम्म पुगे पनि अन्ततः घटेर २,६१४.०४ विन्दुसम्म झरेको थियो।

बजारमा कुल ४ अर्ब १६ करोड रुपैयाँ बराबरको कारोबार भएको छ। दिनभर ३४४ कम्पनीका १ करोड २ लाख २७ हजार ६५ कित्ता सेयर ५९ हजार ८०५ कारोबारमार्फत किनबेच भएका छन्।

कारोबारपछि कुल बजार पुँजीकरण ४५ खर्ब ४ अर्ब रुपैयाँ पुगेको छ भने फ्लोट बजार पुँजीकरण १५ खर्ब २५ अर्ब रुपैयाँ रहेको छ।

रिलायन्स स्पिनिङ सर्वाधिक कारोबारमा

बिहीबार कारोबार रकमका आधारमा रिलायन्स स्पिनिङ मिल्स लिमिटेड (RSML) शीर्ष स्थानमा रहेको छ। कम्पनीको २६ करोड ३७ लाख रुपैयाँ बराबरको सेयर कारोबार भएको छ। कम्पनीको सेयर मूल्य प्रतिकित्ता २ हजार ७७५ रुपैयाँमा बन्द भएको छ।

त्यस्तै, सर्वोत्तम पेन्ट्स इन्डस्ट्रिज लिमिटेड (SAPIL) को सेयर मूल्य १४.९९ प्रतिशतले बढ्दै सकारात्मक सर्किट लागेको छ। कम्पनीको अन्तिम कारोबार मूल्य ७९७.६० रुपैयाँ कायम भएको छ।

धौलागिरि लघुवित्तमा सबैभन्दा ठूलो गिरावट

बिहीबार धौलागिरि लघुवित्त वित्तीय संस्था लिमिटेड (DLBS) को सेयर मूल्य सर्वाधिक घटेको छ। कम्पनीको सेयर मूल्य ५.२६ प्रतिशतले घटेर १ हजार २७ रुपैयाँमा अन्तिम कारोबार भएको छ।

२ उपसमूहमा वृद्धि, अन्यमा दबाब

उपसमूहतर्फ बिहीबार बजारमा मिश्रित प्रदर्शन देखिएको छ। म्युचुअल फन्ड सूचक ०.०३ प्रतिशतले बढ्दै सबैभन्दा धेरै वृद्धि गर्ने उपसमूह बनेको छ।

यसैगरी अन्य समूहको सूचक १.०६ प्रतिशतले घटेर दिनकै सबैभन्दा ठूलो गिरावट बेहोर्ने उपसमूह बनेको छ।