काठमाडौं। दक्षिण कोरियाको E-7 भिसा श्रेणीअन्तर्गत दक्ष नेपाली श्रमिक पठाउने प्रक्रियाका लागि मागपत्र प्रमाणीकरण (Demand Letter Attestation) सुरु भएको छ। सोलस्थित नेपाली राजदूतावासले बुधबार, १२ अगस्ट २०२६ देखि ‘Procedure for Sending Skilled Workers to the Republic of Korea, 2024’ अनुसार मागपत्र प्रमाणीकरण सुरु गरेको जनाएको छ।

दूतावासले सार्वजनिक गरेको सूचनाअनुसार दक्षिण कोरियाका इच्छुक रोजगारदाताले नेपाली दक्ष श्रमिकको मागपत्र दूतावासको अनलाइन प्रणालीमार्फत पेस गर्न सक्नेछन्। रोजगारदाताले आफैं, अधिकृत प्रतिनिधिमार्फत वा विधिवत् अनुमति प्राप्त कोरियन रिक्रुटिङ एजेन्सीमार्फत मागपत्र पेश गर्न सक्ने व्यवस्था गरिएको छ।

मागपत्रका लागि ११ प्रकारका कागजात अनिवार्य

दूतावासले मागपत्र प्रमाणीकरणका लागि विभिन्न ११ प्रकारका कागजात आवश्यक पर्ने जनाएको छ। तीमध्ये:

• कोरियाली परराष्ट्र मन्त्रालयबाट Apostille गरिएको Demand Letter
• वास्तविक रोजगारदाताले कोरियन रिक्रुटिङ एजेन्सीलाई दिएको Power of Attorney वा दुई पक्षबीचको सम्झौता
• दूतावासलाई सम्बोधन गरिएको Guarantee Letter र Undertaking Letter
• Job Contract
• Job Description
• कोरियन रिक्रुटिङ एजेन्सीले नेपाली रिक्रुटिङ एजेन्सीलाई दिएको Power of Attorney तथा सम्बन्धित सम्झौता
• भाषा तथा सीप परीक्षणसम्बन्धी Commitment Letter
• रोजगारदाता कम्पनीको Business Registration Certificate, CEO ID, Company Profile र Operation License
• कोरियन रिक्रुटिङ एजेन्सीको Business Registration Certificate, CEO ID र Company Profile
• नेपालमा इजाजतप्राप्त Recruiting Agency को प्रमाणपत्र
• E-7 भिसाअन्तर्गत विदेशी श्रमिक आवश्यक रहेको सम्बन्धित सरकारी निकायबाट जारी आधिकारिक कागजात

पेस गर्नुपर्नेछ।

‘डिमान्ड लेटर’ प्रमाणीकरणमा नयाँ चरण

E-7 भिसाका नाममा नेपाली श्रमिकलाई दक्षिण कोरिया पठाउने क्रममा मागपत्रको वास्तविकता र रोजगारदाताको वैधानिकता महत्वपूर्ण विषय हो। त्यसैले दूतावासले रोजगारदाता, कोरियन रिक्रुटिङ एजेन्सी र नेपाली म्यानपावर कम्पनीसँग सम्बन्धित कागजातलाई प्रक्रियामा समावेश गरेको देखिन्छ।

विशेषगरी Apostille गरिएका कागजात र रोजगारदाता कम्पनीको आधिकारिक विवरण अनिवार्य गरिनुले फर्जी मागपत्र तथा अनधिकृत श्रमिक आपूर्तिको जोखिम घटाउने उद्देश्य देखिन्छ।

यसले E-7 प्रक्रियामा संलग्न नेपाली म्यानपावर कम्पनी तथा कोरियन रोजगारदातालाई कागजात प्रमाणीकरणमा थप जिम्मेवार बनाउनेछ।

E-7 रोजगारीमा पारदर्शिताको प्रयास

E-7 दक्षिण कोरियाको दक्ष विदेशी श्रमिकका लागि प्रयोग हुने भिसा श्रेणी हो। पछिल्लो समय नेपाली श्रमिकका लागि पनि E-7 मार्फत दक्षिण कोरिया जाने विषयमा चासो बढिरहेको अवस्थामा मागपत्र प्रमाणीकरणको प्रक्रियालाई संस्थागत रूपमा अघि बढाइनुलाई महत्वपूर्ण कदमका रूपमा लिन सकिन्छ।

तर मागपत्र प्रमाणीकरण सुरु हुनु र नेपाली श्रमिक दक्षिण कोरिया पुग्नु दुई फरक प्रक्रिया हुन्। वास्तविक रोजगारदाता, कामको प्रकृति, पारिश्रमिक, सम्झौता, भाषा तथा सीपको मापदण्ड र नेपाली श्रमिकबाट लिइने शुल्कसम्मका विषयमा पारदर्शिता कायम गर्नु उत्तिकै महत्वपूर्ण हुनेछ।

दूतावासले रोजगारदातालाई सबै आवश्यक कागजात पूर्ण र सही रूपमा पेस गर्न आग्रह गरेको छ। विस्तृत कागजातको ढाँचा, आवेदन प्रक्रिया तथा मागपत्र प्रमाणीकरण शुल्कसम्बन्धी जानकारी दूतावासको आधिकारिक वेबसाइटमा उपलब्ध हुने जनाएको छ।