मंगलबार आयोजित *कजरिया मिस नेपाल २०२६ ‘स्याश सेरेमोनी’*मा फाइनलिस्टहरूलाई सम्बोधन गर्दै स्थापितले अब उनीहरू व्यक्तिगत पहिचानको सीमाभन्दा माथि उठेर नेपालको संस्कृति, विविधता, संघर्षशीलता र आशाको प्रतिनिधि बन्नुपर्ने बताएका हुन्।

“तपाईंहरू फरक–फरक प्रदेश, भाषा र समुदायबाट आउनुभएको छ, तर आजदेखि तपाईंहरूको एउटै साझा परिचय छ, तपाईंहरू नेपालका राजदूत हुनुहुन्छ,” उनले भने।

उनले मिस नेपाल प्रतियोगितालाई केवल मञ्चमा देखिने प्रतिभा र आकर्षणको आधारमा मूल्यांकन नगरिने स्पष्ट पार्दै प्रशिक्षण अवधि, सामाजिक कार्य, समुदायसँगको सम्बन्ध र व्यक्तिगत आचरणले पनि प्रतिस्पर्धीको वास्तविक क्षमता निर्धारण गर्ने बताए।

प्रतियोगीहरूलाई आफ्नो विचार र आवाजलाई समाजका महत्त्वपूर्ण मुद्दासँग जोड्न आग्रह गर्दै स्थापितले एकअर्काप्रति सहयोग, सम्मान र सहकार्यको भावना कायम राख्न सुझाव दिए। “प्रतिस्पर्धाले उत्कृष्टता ल्याउँछ, तर दिदीबहिनीको सम्बन्ध अझ बलियो हुन्छ,” उनले भने।

उनका अनुसार मिस नेपालको वास्तविक उपलब्धि केवल ताज जित्नुमा सीमित हुँदैन, बरु त्यसले व्यक्तिलाई आफ्नो आवाज उठाउने अवसर, समाजमा सकारात्मक प्रभाव पार्ने जिम्मेवारी र परिवर्तनको वाहक बन्ने मञ्च प्रदान गर्छ।

“मिस नेपाल कुनै अन्तिम गन्तव्य होइन, यो एउटा शुरुवात हो। अन्तिम दिन ताज पहिरिनुहोस् वा नपहिरिनुहोस्, तपाईंहरूसँग आफ्नो आवाज, एउटा मञ्च र समाजप्रतिको कर्तव्य सधैं रहनेछ,” स्थापितले जोड दिए।

कजरिया मिस नेपाल २०२६ का फाइनलिस्टहरूले अब विभिन्न तालिम, सामाजिक गतिविधि, व्यक्तित्व विकास तथा सार्वजनिक प्रस्तुतिका चरणहरू पार गर्दै अन्तिम प्रतिस्पर्धातर्फ यात्रा गर्नेछन्।

यस्ता कार्यक्रमले सौन्दर्यसँगै आत्मविश्वास, नेतृत्व क्षमता र सामाजिक उत्तरदायित्वलाई प्रवर्द्धन गर्ने अपेक्षा गरिएको छ।