काठमाडौँ, वैदेशिक रोजगारीका लागि आकर्षक तलब र सहज प्रक्रिया हुने आश्वासन दिँदै सर्वसाधारणबाट लाखौँ रुपैयाँ ठगी गरेको अभियोगमा काठमाडौँ उपत्यका अपराध अनुसन्धान कार्यालयले पाँच जनालाई पक्राउ गरी सार्वजनिक गरेको छ। पछिल्लो समय वैदेशिक रोजगारीको नाममा हुने ठगीका घटना बढ्दै गइरहेका बेला यो घटनाले फेरि एकपटक सर्वसाधारणको विदेश जाने सपना कसरी अपराधीहरूको शिकार बन्दै गएको छ भन्ने देखाएको छ।
प्रहरीका अनुसार पक्राउ पर्नेहरूमा ललितपुर धापाखेल बस्ने ४३ वर्षीया विना महर्जन, ४५ वर्षीया विन्दा महर्जन, बागलुङ काठेखोला गाउँपालिका–२ की ४३ वर्षीया कोपिला शर्मा, धनकुटा नगरपालिका–२ का ३१ वर्षीय सन्तोष राई तथा काभ्रे चौंरीदेउरीली नगरपालिका–९ की ४८ वर्षीया कुमारी तामाङ रहेका छन्। उनीहरूले अमेरिका, बेलायत, कम्बोडिया र पोर्चुगलजस्ता मुलुकमा रोजगारीको व्यवस्था गरिदिने भन्दै पीडितहरूलाई प्रलोभनमा पारी रकम असुली गरेको आरोप लागेको छ।
काठमाडौँ उपत्यका अपराध अनुसन्धान कार्यालयका प्रहरी उपरीक्षक मनोहरप्रसाद भट्टका अनुसार विना र विन्दा महर्जनले अमेरिका पठाइदिने भन्दै एक जना पीडितबाट रु १० लाख असुल गरेका थिए। यस्तै, कोपिला शर्माले बेलायत पठाइदिने बहानामा रु १३ लाख, सन्तोष राईले कम्बोडिया पठाइदिने भन्दै रु ३ लाख ७० हजार तथा कुमारी तामाङले पोर्चुगल पठाइदिने भन्दै रु १३ लाख ६० हजार रकम लिएको उजुरी परेको छ। रकम बुझाइसकेपछि उनीहरू सम्पर्कविहीन बनेको पीडितहरूको भनाइ छ।
पीडितहरूले पटक–पटक सम्पर्क गर्न खोज्दा फोन बन्द हुने, कार्यालय नभएको पत्ता लाग्ने तथा विभिन्न बहाना बनाउँदै समय टार्ने गरेको विवरण उजुरीमा उल्लेख गरिएको प्रहरीले जनाएको छ। लामो समयसम्म कुनै प्रगति नभएपछि पीडितहरू प्रहरीको शरणमा पुगेका थिए।
उजुरी दर्ता भएपछि काठमाडौँ उपत्यका अपराध अनुसन्धान कार्यालयले प्रारम्भिक अनुसन्धान सुरु गरी उनीहरूको गतिविधि निगरानी गरेको थियो। अनुसन्धानका क्रममा उनीहरूले वैदेशिक रोजगारीसँग सम्बन्धित कुनै आधिकारिक इजाजतपत्र नराखी ठगी गर्ने उद्देश्यले सर्वसाधारणलाई झुटा आश्वासन दिएको खुलेको प्रहरीको भनाइ छ। त्यसपछि विभिन्न स्थानबाट उनीहरूलाई पक्राउ गरिएको हो।
प्रहरी उपरीक्षक भट्टले पक्राउ परेका सबैलाई आवश्यक अनुसन्धान तथा कानुनी कारबाहीका लागि वैदेशिक रोजगार विभाग, ताहाचल पठाइएको जानकारी दिनुभयो। उहाँका अनुसार घटनासँग थप पीडित हुनसक्ने आशङ्का रहेकाले अनुसन्धानलाई अझ विस्तृत बनाइनेछ।
प्रहरीले पछिल्लो समय वैदेशिक रोजगारीका नाममा ठगी गर्ने घटनाहरू बढ्दो क्रममा रहेको उल्लेख गर्दै विदेश जाने तयारीमा रहेका सर्वसाधारणलाई विशेष सतर्कता अपनाउन आग्रह गरेको छ। वैदेशिक रोजगार विभागबाट इजाजतप्राप्त म्यानपावर कम्पनीमार्फत मात्र प्रक्रिया अघि बढाउन, लिखित सम्झौता नगरी रकम नबुझाउन तथा शङ्कास्पद व्यक्तिबाट आएका प्रस्तावप्रति सचेत रहन प्रहरीको सुझाव छ।
