निगमले जारी गरेको प्रेस विज्ञप्तिअनुसार पछिल्ला दुई–तीन महिनादेखि काठमाडौं उपत्यकासहित देशका विभिन्न स्थानमा एलपी ग्यासको माग अस्वाभाविक रूपमा बढेको देखिएको छ। अन्तर्राष्ट्रिय बजारमा देखिएको अस्थिरता तथा मध्यपूर्व क्षेत्रमा देखिएको द्वन्द्वका कारण पेट्रोलियम पदार्थ र एलपी ग्यासको आपूर्तिमा समेत प्रभाव परेको निगमले जनाएको छ।

निगमका अनुसार भारतबाट नेपालमा ग्यास आपूर्ति हुँदै आएको भए पनि भारतमै उपभोक्तामा आपूर्ति सम्बन्धी समस्या देखिएको समाचार सार्वजनिक भएपछि नेपालमा पनि आवश्यकताभन्दा बढी ग्यास खरिद गरेर भण्डारण गर्ने प्रवृत्ति बढेको देखिएको छ। यसले बजारमा ग्यास अभावको मनोवैज्ञानिक अवस्था सिर्जना गरेको निगमको भनाइ छ।

हालको अवस्थालाई ध्यानमा राख्दै आपूर्ति र वितरण प्रणालीलाई व्यवस्थित बनाउन २०८२ फागुन २९ गतेदेखि अर्को निर्णय नभएसम्म १४.२ केजी क्षमताको सिलिन्डरमा करिब ७.१ केजी एलपी ग्यास भरेर आधा मूल्यमा बिक्री वितरण गर्ने निर्णय गरिएको निगमले जनाएको छ।

निगमका एक अधिकारीका अनुसार यो व्यवस्था लागू गरेपछि उपलब्ध ग्यास धेरै उपभोक्तासम्म पुग्ने अपेक्षा गरिएको छ। “उपभोक्तामा देखिएको अत्यधिक खरिद र भण्डारणको प्रवृत्तिले बजारमा कृत्रिम अभाव देखिएको छ,” उनले भने, “आधा परिमाणमा ग्यास वितरण गर्दा बढी घरपरिवारसम्म ग्यास पुग्ने र आपूर्ति व्यवस्थापन सहज हुने विश्वास गरेका छौं।”

निगमले आम उपभोक्तालाई आवश्यकताभन्दा बढी ग्यास खरिद गरी भण्डारण नगर्न र आवश्यकताअनुसार मात्रै ग्यास खरिद गर्न पनि अनुरोध गरेको छ। साथै आपूर्ति र वितरण प्रणालीलाई नियमित तथा व्यवस्थित बनाइने निगमले जनाएको छ।