काठमाडौँ। पर्वतीय पर्यटन व्यवसायीको छाता संस्था नेपाल पर्वतारोहण सङ्घ (एनएमए) मा कुलबहादुर गुरुङ समूहले उम्मेदवारी घोषणा गरेको छ ।
गुरुङ समूहले कार्यक्रम गरी सङ्घको आगामी भदौ ७ गते काठमाडौँमा हुन लागेको महाधिवेशनका लागि आफ्नो समूहको उम्मेदवारी घोषणा गरेको हो ।
कुलबहादुर गुरुङ : अध्यक्षका उम्मेदवार
धादिङ रुवीभ्यालीका गुरुङ विगत ३३ वर्षदेखि पर्वतीय पर्यटन व्यवसायमा आवद्ध हुनुहुन्छ । उहाँ यसअघि एनएमएको महासचिव भएर काम गरिसक्नुभएको छ ।
- सङ्घको वरिष्ठ उपाध्यक्षमा: टिकाराम गुरुङ,
- प्रथम उपाध्यक्ष: मिङ्मा ग्याबु शेर्पा,
- द्धितीय उपाध्यक्ष: धनबहादुर गुरुङ,
- महासचिव: विमलकुमार नहर्की,
- सचिव: डीमा डिकी शेर्पा र
- कोषाध्यक्ष: सुमी लामा,
संयुक्तरूपमा उम्मेदवारी दिनुभएको छ ।
सदस्यमा:
- पुष्कर शाह,
- बलबहादुर सुयाल,
- हरिगोपाल प्रधान,
- माधवप्रसाद पाण्डे,
- दिकी शेर्पा,
- सुदास लामा,
- लालबहादुर जिरेल,
- नुर्बु छिरिङ शेर्पा लामा,
- पासाङ शेर्पा,
- गिता राई र
- अशोक तामाङले उम्मेदवारी दिनुभएको हो ।
पत्रकार सम्मेलनमा बोल्दै अध्यक्षका उम्मेदवार गुरुङले सुरक्षित, जिम्मेवार दिगो हिमाली पर्यटनको विकासलाई आफ्नो प्रमुख एजेण्डा बनाएको बताउनुभयो । उहाँले जलवायु परिवर्तनका कारण हिमालमा परेको असरलाई विश्वमाझ ध्यानाकर्षण गराउने उल्लेख गर्नुभयो ।
उहाँले हिमालसँग सम्बन्धीत स्थानीय उत्पादन, सेवा र जनशक्तिलाई प्राथमिकता दिने, नयाँ पुस्तालाई पर्वतीय तालिम प्रदान गर्ने, संस्थागत पारदर्शीता कायम राख्ने बताउनुभयो । यस्तै, वार्षिक रुपमा अन्तर्राष्ट्रिय हिमाल महोत्सव आयोजना गर्ने, विश्व मञ्चमा नेपालको हिमाल ‘ब्राण्डिङ’ गर्ने, लगायतका कार्यक्रम आफ्नो प्रमुख प्राथमिकतामा रहेको बताउनुभयो।
उक्त समूहलाई विजयको शुभकामना दिँदै नेकपा एमालेका स्थायी समिति सदस्य एवम् कोशी प्रदेशका पूर्व मुख्यमन्त्री भीम आचार्यले जलवायु परिवर्तनका कारण हिमाल जोगाउन कठिन भइरहेको अवस्थामा अहिलेको मुख्य मुद्दा हिमालको संरक्षण भएको बताउनुभयो।
नेकपा एमालेकी केन्द्रीय सदस्य एवम् कोशी प्रदेशकी पूर्वमन्त्री रचना खड्का, कांग्रेसका नेता एवम् ट्रेकिङ एजेन्सीज् एशोसियशन अफ नेपाल (टान)का पूर्वअध्यक्ष रमेश धमला, नेपाल पर्वतारोहण सङ्घका निवर्तमान अध्यक्ष सन्तविर लामालगायतले मुलुकको अर्थतन्त्रको मेरुदण्ड पर्यटन क्षेत्र भएकाले यसलाई जोगाउन जरुरी रहेको बताउनुभएको थियो।
