काठमाडौं। भारतका विदेश सचिव विक्रम मिस्रीले मंगलबार परराष्ट्र मन्त्रालयमा परराष्ट्रमन्त्री शिशिर खनालसँग शिष्टाचार भेटवार्ता गरेका छन्।
भेटका क्रममा नेपाल र भारतबीचको बहुआयामिक साझेदारीलाई थप गहिरो बनाउने तथा दुई देशबीच रहँदै आएको पुरानो मैत्रीपूर्ण सम्बन्धलाई अझ सुदृढ बनाउने विषयमा छलफल भएको परराष्ट्र मन्त्रालयले जनाएको छ।
नेपाल र भारतबीच राजनीतिक, आर्थिक, व्यापारिक, ऊर्जा, पूर्वाधार, कनेक्टिभिटी तथा जनस्तरको सम्बन्धलगायत विभिन्न क्षेत्रमा सहकार्य रहँदै आएको छ। भेटवार्तामा द्विपक्षीय सम्बन्धका विभिन्न आयाम र आपसी हितका विषयमा समेत कुराकानी भएको जनाइएको छ।
भारतीय विदेश सचिव मिस्रीको यो भेटलाई दुई देशबीचको नियमित कूटनीतिक संवाद तथा सहकार्यलाई निरन्तरता दिने क्रममा महत्वपूर्ण रूपमा हेरिएको छ।
