काठमाडौँ। महाशक्ति सिमेन्ट लिमिटेडले निष्कासन गर्न लागेको करिब १ अर्ब ७८ करोड ५० लाख रुपैयाँ बराबरको सेयरको प्रत्याभूति नागरिक लगानी कोषले गर्ने भएको छ। यससँगै कम्पनीको प्रस्तावित सेयर निष्कासन प्रक्रियाले थप औपचारिक आधार पाएको छ।
सेयर प्रत्याभूतिसम्बन्धी सम्झौतामा शुक्रबार नागरिक लगानी कोषका कार्यकारी निर्देशक पर्वत कुमार कार्की र महाशक्ति सिमेन्टका अध्यक्ष राजाराम खड्काले हस्ताक्षर गरेका छन्।
कम्पनीले प्रतिकित्ता १०० रुपैयाँ अंकित मूल्यका १ करोड ७८ लाख ५० हजार ८५७ कित्ता सेयर निष्कासन गर्ने तयारी गरेको छ। यसको कुल अंकित मूल्य १ अर्ब ७८ करोड ५० लाख ८५ हजार ७०० रुपैयाँ रहेको छ।
सम्झौताअनुसार कम्पनीले सम्झौता भएको मितिले छ महिनाभित्र सेयर निष्कासन गरिसक्नुपर्नेछ। तोकिएको अवधिमा निष्कासन हुन नसकेमा प्रत्याभूति सम्झौता पुनः गर्नुपर्ने व्यवस्था छ।
सेयर प्रत्याभूति व्यवस्थाले प्रस्तावित निष्कासनमा लगानीकर्ताको चासो र निष्कासन प्रक्रियाको विश्वसनीयता बढाउन सहयोग गर्ने अपेक्षा गरिएको छ। महाशक्ति सिमेन्टको सेयर निष्कासनसँगै नेपाली पुँजी बजारमा सिमेन्ट तथा निर्माण सामग्री क्षेत्रको थप कम्पनी प्रवेश गर्ने बाटोसमेत खुल्नेछ।
