बाढीमा ज्यान गुमाएकाप्रति एनभीएलको श्रद्धाञ्जली; घाइतेको शीघ्र स्वास्थ्यलाभको कामना
काठमाडौं। रसुवाको भोटेकोशी नदीमा आएको विनाशकारी बाढीबाट प्रभावित नागरिकको राहत, उद्धार तथा पुनःस्थापनामा सहयोग पुर्याउन एभरेस्ट महिला भलिबल लिग (एनभीएल)ले विशेष पहल अघि बढाएको छ।
एनभीएलले बाढीका कारण ज्यान गुमाएकाहरूप्रति श्रद्धाञ्जली शोकसन्तप्त परिवारजनप्रति समवेदना प्रकट गरेको छ। साथै बाढीमा घाइते भएकाहरूको शीघ्र स्वास्थ्यलाभको कामना गर्दै संकटको समयमा नेपाल सरकारसँगै उभिने प्रतिबद्धता जनाएको छ।
लिगले आफ्नो सामाजिक उत्तरदायित्वअन्तर्गत भदौ १९ गते हुने पहिलो दिनका खेलको टिकट बिक्रीबाट संकलित सम्पूर्ण रकम प्रधानमन्त्री दैवी प्रकोप उद्धार कोषमा जम्मा गर्ने घोषणा गरेको हो।
एनभीएलले उद्धार, उपचार तथा पुनःस्थापनाका लागि आफ्नो तर्फबाट सानो भए पनि सहयोग पुर्याउने उद्देश्यले उक्त निर्णय गरिएको जनाएको छ।
खेलको टिकटबाट राहत कोषमा सहयोग
एनभीएलको पहिलो दिनका खेलका लागि बिक्री हुने टिकटबाट प्राप्त सम्पूर्ण रकम बाढी तथा प्राकृतिक विपद्बाट प्रभावित नागरिकको राहतका लागि प्रयोग गरिनेछ।
एनभीएलका सबै खेलका टिकट आईएमई खल्ती लिमिटेडमार्फत अनलाइन खरिद गर्न सकिनेछ। साथै खेल आयोजना स्थल त्रिपुरेश्वरस्थित राष्ट्रिय खेलकुद परिषद्को कभर्डहलमा राखिएको काउन्टरबाट भौतिक रूपमा समेत टिकट खरिद गर्न सकिने व्यवस्था गरिएको छ।
एनभीएलले भदौ १४ गतेदेखि आईएमई खल्तीमार्फत टिकट बुकिङ खुला गरिएको जानकारी दिएको छ।
‘संकटको समयमा सरकारसँगै छौँ’
भोटेकोशी बाढीका कारण रसुवासहित विभिन्न जिल्लामा ठूलो जनधनको क्षति भएको अवस्थामा खेलकुद क्षेत्रले समेत प्रभावित नागरिकका लागि सहयोगको हात अघि बढाएको हो।
एनभीएलले विपद्को यस कठिन घडीमा पीडित परिवारको साथमा रहेको जनाउँदै उद्धार, उपचार र पुनःस्थापनाका प्रयासमा आफ्नो क्षेत्रबाट सक्दो सहयोग गर्ने प्रतिबद्धता जनाएको छ।
एनभीएलको पहलले खेलकुदलाई मनोरञ्जन र प्रतिस्पर्धाको माध्यम मात्र नभई विपद्का बेला सामाजिक एकता र मानवीय सहयोग जुटाउने माध्यमका रूपमा समेत प्रयोग गर्न सकिने सन्देश दिएको छ।
बाढीबाट प्रभावित नागरिकका लागि राहत आवश्यक भइरहेका बेला खेल हेर्न आउने दर्शकको टिकटबाट संकलित रकम उद्धार कोषमा जम्मा गर्ने निर्णयले खेलकुद र सामाजिक उत्तरदायित्वबीचको सम्बन्धलाई थप बलियो बनाउने अपेक्षा गरिएको छ।
