काठमाडौं। नेपाल उद्योग वाणिज्य महासंघले निजी क्षेत्र अहिले कमजोर माग, बिग्रँदो व्यावसायिक वातावरण र बढ्दो त्रासका कारण दबाबमा रहेको भन्दै अर्थतन्त्र चलायमान बनाउन तत्काल व्यवसायमैत्री वातावरण निर्माण गर्न सरकारसँग आग्रह गरेको छ।
महासंघको वस्तुगत परिषद्ले विभिन्न वस्तुगत संघका नवनिर्वाचित अध्यक्ष तथा पदाधिकारीलाई स्वागत तथा बधाई दिन आयोजना गरेको अन्तरक्रिया कार्यक्रममा महासंघ नेतृत्वले निजी क्षेत्रका साझा समस्या समाधानका लागि सरकारसँग प्रभावकारी संवाद र नीतिगत पहल आवश्यक रहेको औंल्याएको हो।
महासंघका अध्यक्ष अञ्जन श्रेष्ठले व्यवसायीको मनोबल कमजोर बन्दै गएको र बजारमा माग सिर्जना हुन नसकेको अवस्था अर्थतन्त्रका लागि चुनौतीपूर्ण भएको बताउनुभयो। उहाँले लगानी र व्यवसाय विस्तारका लागि अनुकूल वातावरण बनाउन सरकार गम्भीर हुनुपर्ने धारणा राख्नुभयो।
“वस्तुगत समितिका समस्या महासंघका साझा समस्या हुन्। ती समस्या सरकारसमक्ष राख्ने र समाधानका लागि पहल गर्न महासंघ सदैव तयार छ,” अध्यक्ष श्रेष्ठले भन्नुभयो।
उहाँले निजी क्षेत्रका समस्या केवल सम्बन्धित व्यवसाय वा उद्योगको मात्र विषय नभई समग्र अर्थतन्त्रसँग जोडिएको भन्दै सरकार, महासंघ र वस्तुगत संघबीचको सहकार्यलाई थप प्रभावकारी बनाउनुपर्नेमा जोड दिनुभयो।
समस्या छुट्टाछुट्टै, आवाज एउटै
कार्यक्रममा महासंघका वरिष्ठ उपाध्यक्ष सुरकृष्ण वैद्यले निजी क्षेत्रको आवाजलाई प्रभावकारी बनाउन वस्तुगत संघहरूको सक्रियता अपरिहार्य रहेको बताउनुभयो। उहाँले व्यवसायीले उठाएका विषयलाई तथ्य र प्रमाणसहित प्रस्तुत गर्न सके नीतिगत सुधारका लागि सरकारमाथि प्रभावकारी दबाब सिर्जना गर्न सकिने उल्लेख गर्नुभयो।
उपाध्यक्ष कृष्णप्रसाद शर्माले वस्तुगत संघका समस्या समाधानका लागि महासंघले सहजीकरण गर्ने बताउँदै निजी क्षेत्रका साझा मुद्दामा विभाजित नभई एकीकृत आवाज बनाउनुपर्नेमा जोड दिनुभयो।
वस्तुगत परिषद्का सभापति एवं महासंघका उपाध्यक्ष नरेशलाल श्रेष्ठले वस्तुगत संघहरू महासंघका आधारस्तम्भ भएको बताउनुभयो। उहाँले विभिन्न क्षेत्रका समस्या पहिचान गरी साझा एजेन्डाका रूपमा सरकारसमक्ष लैजाने प्रतिबद्धता व्यक्त गर्नुभयो।
त्यस्तै, महासंघका उपाध्यक्ष प्रवलजंग पाण्डेले नीतिगत स्थिरता, लगानीमैत्री वातावरण र प्रतिस्पर्धी बजारलाई उद्योग व्यवसाय विस्तारको आधारका रूपमा प्रस्तुत गर्नुभयो। उहाँले वस्तुगत संघहरूले आफ्ना क्षेत्रका समस्या र सुधारका प्रस्ताव महासंघसँग निरन्तर समन्वय गर्नुपर्ने बताउनुभयो।
औषधीदेखि रुद्राक्षसम्मका समस्या उठे
कार्यक्रममा विभिन्न वस्तुगत संघका नवनिर्वाचित अध्यक्षहरूले आ–आफ्ना क्षेत्रका समस्या तथा सम्भावना प्रस्तुत गरेका थिए।
नेपाल औषधी उत्पादक संघका अध्यक्ष विप्लब अधिकारी, नेपाल गलैंचा उत्पादक तथा निकासीकर्ता संघका अध्यक्ष बलराम गुरुङ, नेपाल कुरियर सेवा संघका अध्यक्ष अनिल राजभण्डारी, नेपाल डेरी एशोसिएसनका अध्यक्ष प्रल्हाद दाहाल, नेपाल जग्गा तथा आवास विकास संघका अध्यक्ष दीपक कुँवर, नेपाल ईटा उद्योग महासंघका अध्यक्ष कृष्णप्रसाद, नेपाल होस्टल एशोसिएसनका अध्यक्ष नरेन्द्रबहादुर बोहोरा, नेपाल पर्यटक यातायात व्यवसायी संघका अध्यक्ष भीमबहादुर गोले तामाङ तथा रुद्राक्ष व्यवसायी संघका अध्यक्ष मनोजकुमार चापागाईंले सम्बन्धित क्षेत्रका चुनौतीबारे धारणा राख्नुभयो।
उनीहरूले औषधी उत्पादन, निर्यात, कुरियर, डेरी, घरजग्गा तथा आवास, इँटा उद्योग, होस्टल, पर्यटक यातायात र रुद्राक्ष व्यवसायमा रहेका नीतिगत तथा व्यावहारिक अवरोध हटाउन सरकार र महासंघबाट पहल आवश्यक रहेको बताए।
कार्यक्रमको अन्त्यमा महासंघका अध्यक्ष, वस्तुगत परिषद्का सभापति तथा पदाधिकारीहरूले नवनिर्वाचित वस्तुगत संघका पदाधिकारीलाई खादा लगाएर स्वागत तथा बधाई ज्ञापन गरेका थिए।
“व्यवसायीको माग एउटै नीतिगत स्थिरता, बजारमा माग र लगानीको वातावरण; महासंघको जोड: क्षेत्रगत समस्या समेटेर सरकारसँग साझा रूपमा पहल।”
