काठमाडौं। नेपाल अटोमोबाइल आयातकर्ता तथा उत्पादक संघ (NAIMA) ले दोस्रो संस्करणको ‘NAIMA Nepal Mobility Expo 2026’ आगामी साउन २६ देखि ३१ गते (अगस्ट ११–१६, २०२६) सम्म काठमाडौंको भृकुटीमण्डपमा आयोजना गर्ने घोषणा गरेको छ। सोमबार द सोल्टी होटलमा आयोजित पत्रकार सम्मेलनमार्फत एक्स्पोका प्रमुख विशेषताहरू सार्वजनिक गरिएको हो।
यस वर्षको एक्स्पोमा ५१ वटा स्टल, ५५ भन्दा बढी अन्तर्राष्ट्रिय तथा स्वदेशी ब्रान्ड र ४० भन्दा बढी नयाँ सवारीसाधन तथा प्रविधिको सार्वजनिक प्रदर्शन (लञ्च) हुने आयोजकले जनाएको छ। एक्स्पोमा दुईपांग्रे, चारपांग्रे, व्यावसायिक सवारी, विद्युतीय तथा हाइब्रिड सवारी, चार्जिङ प्रविधि, अटोमोबाइल सेवा तथा अन्य मोबिलिटी समाधानहरू समेटिनेछन्।
एक वर्षमै २१ बाट ३६ सदस्य कम्पनी
कार्यक्रममा नाइमाकी अध्यक्ष ऋतु सिंह वैद्य ले एक वर्षअघि २१ सदस्य कम्पनीबाट स्थापना भएको संघ अहिले ३६ प्रमुख अटोमोबाइल कम्पनी सम्म विस्तार भएको जानकारी दिइन्। उद्योगले नाइमाप्रति देखाएको विश्वास र एकीकृत प्लेटफर्मको आवश्यकताले संघलाई सशक्त बनाएको उनको भनाइ थियो।
उनले ‘Empowering Growth Through Mobility’ भन्ने दृष्टिकोण र ‘Mobility for All’ भन्ने अभियान केवल एक्स्पोमा सीमित नभई आर्थिक वृद्धि, रोजगारी, उद्यमशीलता, सार्वजनिक सेवा र सहज आवागमनसँग जोडिएको दीर्घकालीन अवधारणा भएको बताइन्।
टिकट आम्दानीको १० प्रतिशत अनुसन्धानमा
नाइमाले यस वर्षको एक्स्पोबाट उठ्ने टिकट आम्दानीको कम्तीमा १० प्रतिशत अनुसन्धान फेलोसिप र क्षमता अभिवृद्धि तालिम मा खर्च गर्ने घोषणा गरेको छ। फेलोसिपमार्फत तयार हुने अनुसन्धानपत्रहरू NAIMA Mobility Journal मा प्रकाशित गरिनेछन्।
संघले भविष्यमा NAIMA Mobility Conclave आयोजना गर्ने, शिक्षा मन्त्रालयसँग सहकार्य गरी अटोमोबाइल तथा मोबिलिटी क्षेत्रमा सीप विकास र रोजगारी केन्द्रित तालिम सञ्चालन गर्ने योजना पनि सार्वजनिक गरेको छ।
ट्राफिक व्यवस्थापनदेखि क्षमता विकाससम्म
गत एक वर्षमा नाइमाले काठमाडौं उपत्यकाका १,६१० ट्राफिक प्रहरीलाई क्षमता विकास तालिम, आन्दोलनका क्रममा क्षतिग्रस्त कार्यालय पुनर्निर्माणमा सहयोग, काठमाडौं उपत्यका ट्राफिक प्रहरी कार्यालय र यातायात व्यवस्था विभागसँग सहकार्य, सडक सुरक्षा, ट्राफिक व्यवस्थापन तथा जनचेतनामूलक कार्यक्रम सञ्चालन गरेको जनाएको छ।
ठूलो प्रदर्शनीस्थलको अभाव
अध्यक्ष वैद्यले यसपटक पनि धेरै कम्पनीले स्टल माग गरे पनि भृकुटीमण्डपको सीमित स्थानका कारण सबैलाई सहभागी गराउन नसकिएको बताइन्। उनले नेपालमा अन्तर्राष्ट्रिय स्तरको ठूलो र आधुनिक प्रदर्शनी केन्द्रको आवश्यकता औँल्याउँदै, व्यावसायिक सवारीसाधनलाई लक्षित छुट्टै मोबिलिटी एक्स्पो आयोजना गर्ने सम्भावनाबारे पनि अध्ययन भइरहेको जानकारी दिइन्।
उद्योग पुनरुत्थानको संकेत
पछिल्ला वर्षहरूमा विद्युतीय सवारीसाधनको बढ्दो प्रयोग, नयाँ ब्रान्डको प्रवेश र उपभोक्ताको रुचिमा आएको परिवर्तनसँगै नेपालको अटोमोबाइल बजार पुनः विस्तारको चरणमा पुगेको देखिन्छ। ५५ भन्दा बढी ब्रान्ड र ४० नयाँ मोडल एकै स्थानमा सार्वजनिक हुने नाइमा नेपाल मोबिलिटी एक्स्पो २०२६ लाई अटोमोबाइल उद्योगको व्यवसायिक गतिविधि, प्रविधि हस्तान्तरण र बजार विस्तारका लागि महत्वपूर्ण मञ्चका रूपमा हेरिएको छ।
#NAIMA#Media&space#
