काठमाडौं । नेपाललाई अन्तर्राष्ट्रिय उच्च शिक्षाको आकर्षक गन्तव्यका रूपमा विकास गर्ने उद्देश्यले शैक्षिक परामर्श क्षेत्रका दुई प्रमुख संस्थाबीच ऐतिहासिक समझदारी भएको छ।
स्वतन्त्र शैक्षिक परामर्शदाता संघ नेपाल (ECAN) र इन्डिपेन्डेन्ट एजुकेसन प्रोभाइडर्स एसोसिएसन नेपाल (IEPAN) ले नेपाललाई विश्वस्तरीय उच्च शिक्षाको केन्द्रका रूपमा स्थापित गर्न दीर्घकालीन सहकार्य गर्ने उद्देश्यसहित समझदारीपत्र (MoU) मा हस्ताक्षर गरेका हुन्।
दुवै संस्थाले संयुक्त रूपमा अन्तर्राष्ट्रिय विद्यार्थी आकर्षित गर्ने, नेपालको उच्च शिक्षा प्रणालीलाई विश्वव्यापी रूपमा प्रवर्द्धन गर्ने, शैक्षिक गुणस्तर अभिवृद्धिमा सहकार्य गर्ने तथा विश्वविद्यालय र शैक्षिक संस्थाबीच अन्तर्राष्ट्रिय साझेदारी विस्तार गर्ने प्रतिबद्धता व्यक्त गरेका छन्।
समझदारीअनुसार नेपालमा अध्ययनका लागि आउने विदेशी विद्यार्थीको संख्या बढाउन संयुक्त प्रवर्द्धन अभियान सञ्चालन गरिनेछ। साथै, अन्तर्राष्ट्रिय शिक्षा मेला, शैक्षिक सम्मेलन, अनुसन्धान तथा क्षमता अभिवृद्धिका कार्यक्रमहरू आयोजना गर्दै नेपालको उच्च शिक्षा क्षेत्रलाई विश्व बजारसँग जोड्ने प्रयास गरिने जनाइएको छ।
दुवै संस्थाले नेपालमा गुणस्तरीय, प्रतिस्पर्धी र अन्तर्राष्ट्रिय मापदण्डअनुसारको उच्च शिक्षा प्रणाली विकास गर्न नीतिगत संवाद, शैक्षिक सुधार र संस्थागत सहकार्यलाई प्राथमिकता दिने बताएका छन्।
उक्त सहकार्यबाट नेपाली विश्वविद्यालय तथा कलेजहरूको अन्तर्राष्ट्रिय छवि सुदृढ हुने, विदेशी विद्यार्थी भित्र्याउने वातावरण तयार हुने, शैक्षिक पर्यटनको प्रवर्द्धन हुने तथा शिक्षा क्षेत्रमार्फत मुलुकको अर्थतन्त्रमा समेत सकारात्मक योगदान पुग्ने अपेक्षा गरिएको छ।
शिक्षा क्षेत्रका सरोकारवालाहरूले यस समझदारीलाई नेपालको उच्च शिक्षालाई अन्तर्राष्ट्रियकरण गर्ने दिशामा महत्वपूर्ण कदमका रूपमा लिएका छन्। उनीहरूका अनुसार सरकारी निकाय, विश्वविद्यालय, निजी शैक्षिक संस्था तथा अन्तर्राष्ट्रिय साझेदारबीच समन्वय प्रभावकारी बनाउन सके नेपाल दक्षिण एसियाकै प्रमुख अध्ययन गन्तव्य बन्ने सम्भावना अझ बलियो हुनेछ।
दुवै संस्थाले आगामी दिनमा संयुक्त कार्ययोजना कार्यान्वयन गर्दै नेपाललाई अन्तर्राष्ट्रिय विद्यार्थीका लागि सुरक्षित, गुणस्तरीय र प्रतिस्पर्धी उच्च शिक्षा गन्तव्यका रूपमा स्थापित गर्न सक्रिय रूपमा काम गर्ने प्रतिबद्धता व्यक्त गरेका छन्।
