मन्त्रिपरिषद्को २०८३ जेठ २६ गते बसेको बैठकले अघिल्लो तदर्थ समिति विघटन गर्दै दोलखाका विशालकुमार भण्डारीको अध्यक्षतामा नौ सदस्यीय नयाँ तदर्थ समिति गठन गरेको थियो।

नयाँ समितिमा गोरखाका ऋषिरमण खनाल महामन्त्री, काठमाडौंका प्रेमसागर कर्माचार्य कोषाध्यक्ष रहेका छन्। सदस्यहरूमा भोजपुरका वसन्तकुमार श्रेष्ठ, दाङकी अबिस्मी न्यौपाने, तेह्रथुमकी पुष्पा दास, सिन्धुपाल्चोकका प्रेम लामा, सप्तरीका मोहम्मद आयतुल्ला रहमान तथा कैलालीकी मञ्जु साउँद (बोहरा) रहेका छन्।

महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्रालयको २०८३ जेठ २९ गतेको निर्देशनअनुसार समितिलाई संस्थागत सुधारका महत्वपूर्ण जिम्मेवारी प्रदान गरिएको छ।

समितिले अब डिजिटल सदस्यता प्रणाली विकास गर्ने, सबै सदस्यको अनिवार्य दर्ता, नवीकरण तथा अद्यावधिक गर्ने, सामाजिक सञ्जालमार्फत सदस्यता विस्तार अभियान सञ्चालन गर्ने, युवाको सहभागिता र प्रतिनिधित्व सुनिश्चित गर्ने लगायतका कार्य अगाडि बढाउनेछ।

त्यसैगरी, नेपाल रेडक्रसको वर्तमान संरचनालाई संविधानअनुसारको संघीय शासन प्रणालीअनुकूल संघ, प्रदेश र स्थानीय तहमा पुनःसंरचना गर्ने, एक व्यक्ति–एक पदको नीति लागू गर्ने तथा डिजिटल रूपमा अद्यावधिक सदस्यहरूको सहभागितामा आगामी निर्वाचन सम्पन्न गराउने जिम्मेवारी पनि नयाँ समितिलाई दिइएको छ।

नयाँ नेतृत्वलाई नेपाल रेडक्रस सोसाइटीका कर्मचारीहरूले केन्द्रीय कार्यालयमा स्वागत गरेका थिए। नयाँ तदर्थ समितिको आगमनसँगै नेरेसोमा संगठनात्मक सुधार, पारदर्शिता, आधुनिक व्यवस्थापन प्रणाली र लोकतान्त्रिक प्रक्रियालाई थप सुदृढ बनाउने अपेक्षा गरिएको छ।