काठमाडौं। नेपाल औषधि व्यवसायी संघ, काठमाडौं जिल्ला शाखाको आयोजनामा सम्पन्न ‘थोक व्यवसायी एकता भेला तथा व्यवसायको भविष्य संवाद’ कार्यक्रममा औषधि व्यवसाय क्षेत्रका वर्तमान अवस्था, चुनौती, प्रविधिको प्रयोग तथा भविष्यका सम्भावनाबारे व्यापक छलफल गरिएको छ।
काठमाडौं जिल्ला शाखाका अध्यक्ष शंकर महर्जनको अध्यक्षतामा सम्पन्न कार्यक्रममा नेपाल औषधि व्यवसायी संघ बागमती प्रदेशका अध्यक्ष ध्रुव नारायण श्रेष्ठ प्रमुख अतिथिका रूपमा उपस्थित हुनुहुन्थ्यो।
कार्यक्रममा काठमाडौं जिल्ला शाखाका महासचिव शुभमान श्रेष्ठले औषधि व्यवसायसँग सम्बन्धित विभिन्न समसामयिक विषयमा प्रस्तुतिकरण गर्दै व्यवसायिक समस्या, नीतिगत व्यवस्था, बजार व्यवस्थापन तथा आगामी कार्यदिशाबारे जानकारी गराउनुभयो।
यसैगरी, फेवा टेक्नोलोजीका प्रतिनिधिले संघको डिजिटल एप्स तथा सूचना प्रविधि प्रणालीका विषयमा प्रस्तुति दिनुभएको थियो। उहाँले एप्समार्फत सदस्यहरूको सूचना व्यवस्थापन, सेवा प्रवाहलाई सहज बनाउने, व्यवसायीहरूबीच समन्वय बढाउने तथा संघलाई डिजिटल रूपान्तरणतर्फ अघि बढाउने योजनाबारे जानकारी गराउनुभयो।
“हाम्रो व्यवसाय, हाम्रो आवाज, हाम्रो भविष्य” भन्ने नारासहित आयोजित कार्यक्रममा सहभागी व्यवसायीहरूले औषधि व्यवसायलाई समयानुकूल, व्यवस्थित तथा प्रविधिमैत्री बनाउँदै व्यवसायीहरूको साझा हितका लागि एकताबद्ध भएर अघि बढ्नुपर्नेमा जोड दिएका थिए।
