यस सम्झौताले दुई देशका किसान समुदायबीच ज्ञान, अनुभव र प्रविधिको आदान–प्रदानलाई विस्तार गर्दै कृषि क्षेत्रमा दीर्घकालीन साझेदारीको आधार तयार गरेको छ। विशेषगरी किसान–किसान सिकाइ, प्राविधिक सहयोग, कृषि उद्यमशीलता, नवप्रवर्तन र अनुसन्धानका क्षेत्रमा संयुक्त कार्यक्रम सञ्चालन गरिनेछ।

समझदारीपत्रअनुसार दुवै संस्थाले कृषि मूल्य शृंखला विकास, बजार पहुँच विस्तार, जलवायु परिवर्तनका चुनौतीसँग सामना गर्न जलवायुमैत्री खेती प्रणालीको प्रवर्द्धन तथा सहकारी संस्थाको संस्थागत क्षमता वृद्धि गर्न सहकार्य गर्नेछन्।

यो साझेदारीले कृषि क्षेत्रमा युवा र महिलाको नेतृत्व तथा सहभागिता अभिवृद्धि गर्न विशेष जोड दिएको छ। युवालाई कृषि उद्यमशीलतामा आकर्षित गर्ने र महिलालाई निर्णय प्रक्रियामा थप सशक्त बनाउने साझा लक्ष्य दुवै संस्थाले लिएका छन्।

समझदारीपत्रलाई दुवै संस्थाका नेतृत्वले दक्षिण–दक्षिण सहकार्यको उत्कृष्ट उदाहरणका रूपमा व्याख्या गर्दै यसले नेपाल र केन्याका किसानबीच मित्रता, अनुभव आदान–प्रदान र कृषि क्षेत्रको दिगो विकासमा महत्वपूर्ण योगदान पुर्‍याउने विश्वास व्यक्त गरेका छन्।

यो सहकार्यले विश्वव्यापी कृषि चुनौतीबीच विकासशील राष्ट्रका किसान संगठनहरूबीच एकता र साझेदारीलाई अझ मजबुत बनाउने अपेक्षा गरिएको छ।