काठमाडौं। नेपाल राष्ट्र बैंकले नेपाल सरकारतर्फबाट आफू मार्फत जारी गरिएका नागरिक बचतपत्र र वैदेशिक रोजगार बचतपत्रका केही धनीहरूले अझैसम्म परिपक्व भएको साँवा तथा आर्जित ब्याज रकम भुक्तानी नलिएको जनाएको छ।
राष्ट्र बैंकअन्तर्गत मौद्रिक व्यवस्थापन विभाग, थापाथली, काठमाडौं ले एक सूचना जारी गर्दै २०८१ जेठ मसान्तसम्म परिपक्व भएका बचतपत्रको भुक्तानी लिन बाँकी रहेका सम्बन्धित सबै बचतपत्रधनीलाई यथाशीघ्र सम्पर्क गर्न आग्रह गरेको हो।
सूचनाअनुसार नेपाल सरकारको तर्फबाट नेपाल राष्ट्र बैंकमार्फत जारी गरिएका उक्त बचतपत्रमध्ये केहीको साँवा र ब्याज रकम परिपक्व भइसक्दा पनि भुक्तानी नलिइएको देखिएको छ।
राष्ट्र बैंकले त्यस्ता बचतपत्रधनीलाई आवश्यक कागजातसहित मौद्रिक व्यवस्थापन विभागमा सम्पर्क गरी आफ्नो बाँकी भुक्तानी प्राप्त गर्न अनुरोध गरेको छ।
नागरिक बचतपत्र र वैदेशिक रोजगार बचतपत्रलाई सरकारले विगतदेखि सर्वसाधारण तथा वैदेशिक रोजगारीमा रहेका नेपालीलाई लक्षित गर्दै सुरक्षित लगानी साधन का रूपमा जारी गर्दै आएको छ। यस्ता बचतपत्रमा लगानीकर्ताले निश्चित अवधिपछि साँवा र ब्याजसहितको प्रतिफल प्राप्त गर्ने व्यवस्था रहँदै आएको छ।
राष्ट्र बैंकको यो सूचनाले बचतपत्र खरिद गरेर परिपक्वता अवधि नाघिसक्दा पनि रकम दाबी नगरेका धनीहरूलाई आफ्नो लगानीबारे पुनः सचेत गराएको छ। बैंकले समयमै सम्पर्क गरी भुक्तानी प्रक्रिया पूरा गर्न आग्रह गरेको छ।
