काठमाडौं। पुष्प व्यवसायको प्रवर्द्धन तथा हरित अर्थतन्त्रको सन्देश बोकेको २७औँ फ्लोरा एक्स्पोले सकारात्मक ऊर्जा र आर्थिक गतिविधि दुवैमा उल्लेखनीय गति दिएको छ। फ्लोरिकल्चर एसोसिएसन नेपालको आयोजनामा भइरहेको एक्स्पोमा दुई दिनमै एकाउन्न लाख रुपैयाँभन्दा बढीको कारोबार भएको तथ्यांक सार्वजनिक गरिएको छ।
मेलामा सहभागी व्यवसायीहरूले व्यापारमा उत्साहजनक प्रतिक्रिया प्राप्त भएको बताएका छन् भने अवलोकनकर्ताहरूको भीडले पनि यसको लोकप्रियता बढाएको छ। दुई दिनमै २७ हजारभन्दा बढीले अवलोकन गरेको तथ्यांकले पुष्प व्यवसायको बजार विस्तार हुँदै गएको संकेत गर्छ।
कार्यक्रमले स्वदेशी उत्पादनलाई प्रवर्द्धन गर्दै साना तथा मझौला उद्यमीलाई बजारसँग जोड्ने अवसर सिर्जना गरेको छ। साथै, वातावरणमैत्री जीवनशैली अपनाउन प्रेरित गर्ने सन्देश पनि प्रवाह गरिरहेको छ।
चैत ८ गतेसम्म सञ्चालन हुने एक्स्पोले आगामी दिनमा अझ ठूलो आर्थिक कारोबार र सहभागिता जुटाउने अपेक्षा गरिएको आयोजकको भनाइ छ।
