काठमाडौं। खाद्य प्रविधि तथा गुण नियन्त्रण विभागले पछिल्लो ६ महिनामा देशभर सञ्चालन गरेको बजार अनुगमनका क्रममा उनानतिस लाख रुपैयाँभन्दा बढी मूल्यका अखाद्य तथा गुणस्तरहीन वस्तु जफत गरी नष्ट गरेको जनाएको छ।
विभागका अनुसार विभिन्न जिल्ला तथा मुख्य बजार क्षेत्रमा गरिएको नियमित तथा आकस्मिक निरीक्षणका क्रममा म्याद गुज्रेका, लेबल नभएका, गुणस्तर परीक्षणमा असफल भएका तथा स्वास्थ्यका लागि हानिकारक खाद्य सामग्री फेला परेका थिए। ती सामग्री तत्काल नियन्त्रणमा लिई कानुनी प्रक्रिया पूरा गरी नष्ट गरिएको जनाइएको छ।
अनुगमनका क्रममा केही उद्योग तथा व्यवसायीलाई स्पष्टीकरण सोधिनुका साथै जरिवाना समेत गरिएको विभागले जानकारी दिएको छ। उपभोक्ताको स्वास्थ्य सुरक्षा सुनिश्चित गर्न आगामी दिनमा पनि अनुगमनलाई अझ प्रभावकारी बनाइने बताइएको छ।
विभागले उपभोक्तालाई खाद्य सामग्री खरिद गर्दा म्याद, लेबल र उत्पादन विवरण जाँच गर्न आग्रह गरेको छ। साथै शंकास्पद वस्तु देखिएमा सम्बन्धित निकायमा उजुरी दिन अनुरोध गरिएको छ।
