काठमाडौं। सञ्चारकर्मी तथा स्रष्टा गीता अधिकारीले आफ्नो जन्मदिनको अवसर पारेर गीति एल्वम ‘भावस्पन्दन’ श्रोतातथा दर्शकमाझ ल्याउनुभएको छ।
मिलापको आयोजनामा बिहीबार काठमाडौंमा आयोजित विशेष समारोहबीच महाकाव्यकार खेमनाथ दाहालको सभापतित्वमा एल्वमको लोकार्पण गरिएको हो ।
कार्यक्रममा गीतकार तथा साहित्यकार अमर वान्तु प्रमुख अतिथिका रूपमा सहभागी रहनुभएको थियो ।लोकार्पण समारोहमा गीतकार संघका अध्यक्ष वसन्त वित्यासी थापा, अन्तर्राष्ट्रिय नेपाली साहित्य समाज(अनेसास)का अध्यक्ष राधेश्याम लेकाली, वरिष्ठ कलाकार तथा गीतकार उत्तम केसी, वरिष्ठ संगीतकार राजु सिंह, स्रष्टा गीता अधिकारी ,एल्वमसँग सम्बन्धित संगीतकार दीपक शर्मा,संगीतकार राजेन्द्र बजगाईं र गायक सविन सुवेदी लगायतले संयुक्त रूपमा एल्वम सार्वजनिक गर्नुभएको थियो।
कार्यक्रमको सहजीकरण गीतकार तथा चलचित्र विकास बोर्डका सदस्य गणेश सुवेदीले गर्नुभएको थियो भने मिलापका सम्पादक कृष्ण भुसालले स्वागत मन्तव्य राख्नुभएको थियो।सम्पादक भुसालले मिलाप पत्रिका विगत १७ वर्षदेखि निरन्तर प्रकाशन हुँदै आएको उल्लेख गर्दै भाषा,साहित्य,कला र संस्कृतिसँग सम्बन्धित समाचारलाई प्राथमिकतामा राख्दै आएको जानकारी दिनुभयो ।
शुभकामना मन्तव्यका क्रममा संगीतकार दीपक शर्माले गीता अधिकारीका गीतमा संगीत संयोजन गर्न पाएको अनुभव साझा गर्दै उहाँका सिर्जनामा मनोरञ्जनसँगै सशक्त सन्देश समेटिने धारणा व्यक्त गर्नुभयो।वरिष्ठ पत्रकार तथा गीतकार डब्बु क्षेत्रीले गीतासँग लामो समयदेखि पत्रकारितामा सहकार्य रहेको स्मरण गर्दै पछिल्लो समय सृजनात्मक क्षेत्रमा देखिएको कृत्रिम बुद्धिमत्ता(एआइ)को प्रभावबारे चर्चा गर्नुभयो।
कीर्तिमानी संगीतकार सन्तोष श्रेष्ठले गीता अधिकारीले आफ्नो जन्मदिनमा सृजनात्मक कृति सार्वजनिक गर्ने परम्परा बसाल्नुभएको उल्लेख गर्दै यसअघि जन्मदिनकै अवसरमा ‘मैले पढेका ५१ पुस्तक’ र ‘मेरा कलमका डोबहरू’ सार्वजनिक गरिसकेको जानकारी दिनुभयो।
यस्तै,कलाकार रोशनी केसीले गीताको निरन्तर सृजनात्मक सक्रियताको प्रशंसा गर्दै उहाँको लेखनप्रति आफू प्रशंसक रहेको बताउनुभयो।वरिष्ठ संगीतकार राजु सिंहले गीताका हरेक सिर्जनालाई नजिकबाट नियाल्दै आएको उल्लेख गर्दै उहाँको एउटा गीतमा आफूले पनि संगीत गरिरहेको जानकारी दिनुभयो।अनेसास नेपाल च्याप्टरका अध्यक्ष राजेन्द्र केसीले गीता अधिकारी अनेसासको आजीवन सदस्य रहेको बताउँदै उहाँको साहित्यिक यात्रामा योगदानको चर्चा गर्नुभयो।
गीतकार संघका अध्यक्ष वसन्त वित्यासी थापाले सञ्चारकर्ममा जस्तै गीतकारका रूपमा पनि गीता अधिकारी सशक्त र अब्बल रहेको धारणा राख्नुभयो।प्रमुख अतिथि अमर वान्तुले गीताका यसअघि प्रकाशित कृतिहरू अध्ययन गरेको उल्लेख गर्दै गीतकारका रूपमा उहाँको शब्द चयन र भाव अभिव्यक्ति विशिष्ट रहेको बताउनुभयो ।
एल्वमकी स्रष्टा गीता अधिकारीले सानैदेखि गीत,संगीत र साहित्यप्रति गहिरो रुचि रहेको उल्लेख गर्दै पछिल्लो समय आफ्नो जन्मदिनमा कृति सार्वजनिक गर्ने परम्परा सुरु गरेको जानकारी दिनुभयो।आगामी दिनमा पनि यसलाई निरन्तरता दिने प्रतिबद्धता उहाँले व्यक्त गर्नुभयो।
सभापतिको आसनबाट बोल्दै महाकाव्यकार खेमनाथ दाहालले गीताका यसअघिका दुई पुस्तकमा आफूले भूमिका लेखेको स्मरण गर्दै उहाँका कर्म र सृजनशीलता अनुकरणीय रहेको धारणा राख्नुभयो।
बिहीबार लोकार्पण गरिएको एल्वम ‘भावस्पन्दन’ मा‘यतै घमाइलो उतै घमाइलो’,‘बजाउँदै चुरा’,‘तीजैमा ब्रत बसी’, ‘श्वास फेरि’, ‘छम छम नाचौं’,‘कति सजिलै’ र ‘माटोको सुगन्ध’गरी सात गीत समावेश छन्।
एल्वमका गीतहरूमा सारिका घिमिरे,योगेशकाजी,शान्तिश्री परियार, सविन सुवेदी र स्मिता प्रधानको स्वर रहेको छ भने दीपक शर्मा, योगेशकाजी, राजेन्द्र बजगाईं र जीवन शर्माको संगीत रहेको छ।
एल्वम लोकार्पण समारोहकै क्रममा केक काटेर स्रष्टा गीता अधिकारीको जन्मोत्सव पनि मनाइएको थियो।कार्यक्रममा गायक चेतन राई, रमेश पाठक, साहित्यकार शैलेन्द्र चापागाईं,कलाकार तथा मोडल कृष्ण रसाल, शिला गजुरेल, गायक तथा संगीतकार सागर अधिकारी ‘शरद’, पत्रकार तुलसी गिरी ‘भावुक’, किशन अर्याल, रिना श्रेष्ठ, पत्रकार प्रविन किराती, ट्याटु आर्टिस्ट सुनिता कुँवर, मोहमद जलिम, सुरेन्द्र थापा ‘स्माइल’ लगायत गीत–संगीत,साहित्य, कला र सञ्चार क्षेत्रका व्यक्तित्वहरूको उल्लेखनीय उपस्थिति रहेको थियो।
