चितवन, रत्ननगर नगरपालिका–टिकौली चौरमा आयोजित दोस्रो चितवन मह उत्सव-२०८२ भव्य रूपमा सञ्चालन भएको छ। राष्ट्रिय कृषि आधुनिकीकरण कार्यक्रम, कार्यक्रम कार्यान्वयन इकाइ (NAMP-PIU) चितवन तथा जोन संचालक समन्वय समिति, मौरी जोन, चितवनको संयुक्त आयोजनामा यो मह उत्सव आयोजना गरिएको हो। उत्सवले मह उत्पादन, मौरीपालन, कृषक सशक्तिकरण तथा स्थानीय उत्पादनको प्रवर्द्धनमा महत्वपूर्ण योगदान पुर्याएको आयोजकहरूले बताएका छन्।
उत्सवको प्रमुख उद्देश्य चितवन जिल्लामा उत्पादन हुने गुणस्तरीय महलाई प्रवर्द्धन र बजारीकरण गर्नु, साथै मौरीपालक किसानलाई आर्थिक रूपमा सशक्त बनाउनु रहेको आयोजकको भनाइ छ। महको गुणस्तर र स्वादका विविधता देखाउने प्रदर्शनीको साथै मह उत्पादन सम्बन्धी जानकारी तथा बिक्रीका लागि विभिन्न स्टल पनि स्थापना गरिएको थियो।
चितवनका सरोकारवाला निकाय तथा कृषक समुदाय उत्सवमा सक्रिय सहभागितामा थिए र दर्शकहरू पनि उत्साहका साथ उपस्थित थिए। यस क्रममा मह उत्पादन, मौरीपालन प्रवर्द्धन, र कृषि उद्यमशीलताबारे विभिन्न सत्र संचालन तथा कृषि प्रविधि सम्बन्धी सल्लाह तथा ज्ञान आदानप्रदान कार्यक्रमहरू समेत आयोजित गरिएका थिए।
उत्सव सफल रूपमा सम्पन्न भएकोमा आयोजक समितिले प्रत्यक्ष तथा अप्रत्यक्ष रूपमा सहयोग पुर्याउने सम्पूर्ण अतिथि, कृषक, मौरीपालक, सरोकारवाला निकाय तथा दर्शकवृन्दप्रति हार्दिक धन्यवाद व्यक्त गरेको छ।
कार्यक्रमले स्थानीय उत्पादनको बजार विस्तार तथा कृषि क्षेत्रमा नवप्रवर्तन र श्रमशीलता प्रवर्द्धन गर्ने दिशामा सकारात्मक सन्देश पठाएको उल्लेख गरिएको छ।
