काठमाडौँ। कोशी प्रदेशको ओखलढुङ्गा जिल्लामा अवस्थित खिजिदेम्बा गाउँपालिकाका विभिन्न पर्यटकिय स्थानहरुमा छायांकन गरिएको गायिका मनमाया पङ्गेनीको नयाँ गीत ” ऎना जस्तै हिमाल हेर्दा” उत्कृष्ट म्युजिक भिडियो सहित सार्वजनिक भएको छ ।
गायिका स्वयंकै शब्द रचना रहेको उक्त गीतमा वरिष्ठ संगीतकार राजकुमार बगरको संगीत रहेको छ भने कमल सौरागको संगित संयोजन रहेको छ ।
एभरेष्ट ग्यालरीले निर्माण गरेको उक्त म्युजिक भिडियोमा सदाबहार मोडल/ कलाकार सनम कठायत र पुनम श्रेष्ठको अभिनय रहेको छ भने छायांकन दिपक गिरि र सम्पादन विकास दाहालको रहेको छ ।
नेपाल सरकारकी सहसचिव समेत रहनु भएकी गायिका मनमाया पंगेनीको अफिसियल युट्युवबाट सार्वजनिक भएको उक्त म्युजिक भिडियो सर्वत्र चर्चा बटुल्न सफल भएको छ ।
एभरेष्ट ग्यालरीको प्रचारप्रसारको राष्ट्रिय अभियान दृश्यमा नेपाल अन्तर्गत छायांकन गरिएको उक्त म्युजिक भिडियोले छायांकन स्थल ओखलढुङ्गा जिल्लाको खिजिदेम्बा गाउँपालिका क्षेत्रको पर्यटन प्रवर्द्धन तथा प्रचारप्रसारमा टेवा पुग्ने कुरामा निर्माण कम्पनी विश्वस्त रहेको छ ।
यसै गरि नेपाल चलचित्र विकास बोर्डले समेत छायांकनका लागि उपयुक्त नेपालका विभिन्न नविनतम गन्तव्यहरुको पहिचान गरि आवश्यक प्रचारप्रसारका साथै छायांकनका कार्यहरुमा सहजीकरण गर्ने अभियान समेत थालेको छ ।
