वैदेशिक रोजगार सम्बन्धी उजुरी र गुनासोको तत्काल सम्बोधन गर्ने तयारी भइरहेको जानकारी दिनुभयो ।
विभागद्वारा आज यहाँ आयोजित पत्रकार सम्मेलनमा विभागका महानिर्देशक कमलप्रसाद भट्टराईले वैदेशिक रोजगारसम्बन्धी उजुरी र गुनासोको तत्काल सम्बोधन गर्ने तयारी भइरहेको जानकारी दिनुभयो ।
वैदेशिक रोजगार व्यवसायी बाहेक अन्य संस्था वा व्यक्तिले वैदेशिक रोजगारसम्बन्धी विज्ञापन गरेको विषय, राहदानी सङ्कलन गर्ने र रोजगारमा पठाइदिने भनी रकम लिएको सम्बन्धमा प्राप्त उजुरीमाथि तत्काल अनुगमन गरी कारबाहीे अघि बढाइने बताउनुभयो ।
आफ्नो कार्यअवधिको कार्यविवरण तथा विभागका आगामी योजनाबारे जानकारी दिँदै महानिर्देशक भट्टराईले वैदेशिक रोजगारीसम्बन्धी ठगी, राहत उद्धार, अनुगमन र नियमनलाई थप प्रभावकारी बनाउन योजनाबद्ध रूपमा कदम चालिने बताउनुभयो।
भट्टराईले “कानुन विपरीत वैदेशिक रोजगारसम्बन्धी कार्य गर्नेलाई कारबाहीको दायरामा ल्याउँछाँै”, उहाँले भन्नुभयो।
उहाँका अनुसार उपत्यकाभित्रका इजाजतपत्र प्राप्त संस्थाको अनुगमनलाई थप व्यवस्थित बनाउन अनुगमन स्वीकृतिको ढाँचा तर्जुमा गरिनेछ।
उजुरीको संवेदनशीलताका आधारमा आकस्मिक रूपमा अनुगमन टोली परिचालन गरिने उहाँले उल्लेख गर्नुभयो ।
विभागद्वारा सम्पादन गरिने सेवा प्रवाहलाई सरल र सहज बनाउन आफ्नो योजनाबारे कार्यक्रममा महानिर्देशक भट्टराईले जानकारी दिनुभयो । “नागरिक एपमा स्वीकृतिको स्टिकर र वैदेशिक रोजगारीका विज्ञापन मात्र देखिने अवस्था रहेको हुँदा यस प्रणालीलाई नागरिक एप तथा राष्ट्रिय परिचयपत्रसँग आबद्ध गर्ने विभागको योजना छ । यसबाट सेवाग्राहीले पटकैपिच्छे आफ्नो विवरण भरिरहनुपर्ने बाध्यता अन्त्य हुने विभागको विश्वास छ”, उहाँले भन्नुभयो।
महानिर्देशक भट्टराईले श्रम स्वीकृतिको सेवा प्रवाहलाई ‘वर्क परमिट अन द सेम डे’ को मान्यताअनुसार अनलाइन फारम भरेको दिन स्वीकृत गर्न विभाग प्रतिबद्ध रहेको बताउनुभयो।
ताहाचलस्थित विभागले श्रम स्वीकृति, नीतिगत, नियमनकारी, प्रवर्धनात्मक तथा अनुसन्धानात्मक र उद्धार तथा राहत समन्वयसम्बन्धी कार्य गर्दै आएको छ ।
