कार्यक्रमलाई सम्बोधन गर्दै अध्यक्ष पाठकले साना किसानको आर्थिक, सामाजिक तथा उद्यमशील विकासलाई केन्द्रमा राखेर संस्थाले विगत २५ वर्षदेखि निरन्तर काम गर्दै आएको बताउनुभयो। ग्रामीण क्षेत्रमा कृषि उत्पादन, रोजगारी सिर्जना र वित्तीय पहुँच विस्तारका लागि संस्थाले खेलेको भूमिका आगामी दिनमा अझ प्रभावकारी बनाइने उहाँको भनाइ थियो।

प्रमुख अतिथि गुणाकर भट्टले नेपालको कृषि तथा ग्रामीण अर्थतन्त्रको दिगो विकासका लागि साना किसानमा आधारित वित्तीय प्रणालीलाई थप सबल बनाउनुपर्ने आवश्यकता औँल्याउनुभयो। उत्पादनमूलक क्षेत्रमा लगानी बढाउँदै आधुनिक कृषि, उद्यमशीलता र वित्तीय साक्षरतामार्फत ग्रामीण अर्थतन्त्रलाई गतिशील बनाउन यस्ता संस्थाको भूमिका महत्वपूर्ण रहेको उहाँले बताउनुभयो।

संस्थाले जारी गरेको प्रेस विज्ञप्तिअनुसार २०५८ सालमा स्थापना भएको साना किसान विकास लघुवित्त हाल नेपालका ७७ जिल्लाका ५७४ भन्दा बढी स्थानीय तहमा सेवा विस्तार गरिसकेको छ। संस्थासँग १ हजार ९ सय ६५ साझेदार सहकारी संस्था आबद्ध रहेका छन् भने करिब १० लाख परिवार लघुवित्त सेवाबाट लाभान्वित भएका छन्। सदस्यहरूमध्ये महिलाको सहभागिता ५७ प्रतिशत, दलित ११ प्रतिशत र जनजाति १९ प्रतिशत रहेको जनाइएको छ।

संस्थाले विगत १५ वर्षदेखि पशुपालन तथा ६ वर्षदेखि तरकारी खेतीका लागि नेपाल सरकारको सहयोगमा सहुलियतपूर्ण कर्जा कार्यक्रम सञ्चालन गर्दै आएको जनाएको छ। आर्थिक वर्ष २०८१/८२ सम्म पशुपालनतर्फ १ लाख ६७ हजार किसानलाई रु. २० अर्ब ६० करोड ६० लाख तथा तरकारी खेतीतर्फ ३ लाख ३४ हजारभन्दा बढी किसानलाई रु. ४६ अर्ब १० करोड ४५ लाख कर्जा प्रवाह गरिएको विज्ञप्तिमा उल्लेख छ।

कर्जा लगानीबाट लाखौँ किसानले पशुपालन र तरकारी खेती विस्तार गरी उत्पादन तथा आम्दानी वृद्धि गरेको संस्थाको दाबी छ। साथै, पशुधन संरक्षण, वित्तीय साक्षरता, क्षमता अभिवृद्धि, सहकारी अनुगमन र युवा उद्यमशीलता विकासका कार्यक्रमसमेत सञ्चालन गर्दै आएको जानकारी दिइएको छ।

संस्थाले आगामी दिनमा पनि साना किसानको उत्पादन, आयआर्जन, वित्तीय पहुँच र ग्रामीण अर्थतन्त्रको दिगो विकासलाई प्राथमिकतामा राखी आफ्नो सेवा र कार्यक्रमलाई थप प्रभावकारी बनाउने प्रतिबद्धता व्यक्त गरेको छ।