“स्थानीय उत्पादन प्रवर्द्धन र महिला सशक्तीकरणमा जोड”
काठमाडौं। नागार्जुन नगरपालिकामा स्थानीय महिला उद्यमीहरूले उत्पादन गरेका सामग्रीहरूको स्टल/प्रदर्शनी तथा बिक्री मेला औपचारिक रूपमा सुरु भएको छ।
मेलाको उद्घाटन नगरपालिकाकी कार्यवाहक मेयर सुसिला अधिकारीको प्रमुख आतिथ्यमा गरिएको हो।
नगरपालिकाको आयोजनामा सुरु भएको उक्त मेलामा नागार्जुन क्षेत्रभित्रका महिला उद्यमीहरूले उत्पादन गरेका विभिन्न घरेलु, हस्तकला तथा कृषि सामग्रीहरू प्रदर्शन तथा बिक्रीका लागि राखिएको छ।
तीन दिनसम्म सञ्चालन हुने मेला
कार्यक्रम २०८२ साल चैत २७, २८ र २९ गतेसम्म सञ्चालन हुने जनाइएको छ। मेला प्रत्येक दिन बिहान ८ बजेदेखि साँझ ७ बजेसम्म खुला रहनेछ।
कार्यक्रम सीतापाइला क्षेत्रअन्तर्गत ताम्राकार कम्प्लेक्स (सेल्सबेरी)को पार्किङ ग्राउण्ड, वडा नं.४ मा आयोजना गरिएको छ।
महिला उद्यमशीलता प्रवर्द्धनमा नगरपालिकाको पहल
उद्घाटन कार्यक्रममा बोल्दै कार्यवाहक मेयर सुसिला अधिकारीले “महिला उद्यमीलाई आत्मनिर्भर बनाउने र उनीहरूको उत्पादनलाई बजारसँग जोड्ने उद्देश्यले यस्तो कार्यक्रम आयोजना गरिएको बताउनुभयो।”
उहाँले यस्ता मेलाले महिला उद्यमीलाई प्रत्यक्ष बजार पहुँच दिने, स्थानीय उत्पादनको प्रवर्द्धन गर्ने र आर्थिक गतिविधि बढाउने विश्वास व्यक्त गर्नुभयो।
स्थानीय उत्पादनलाई प्राथमिकता
मेलामा: घरेलु तथा साना उद्योगका सामग्री, हस्तकला, कृषि तथा प्रशोधित उत्पादन र स्थानीय परिकारहरू प्रदर्शन तथा बिक्रीका लागि राखिएका छन्।
यसले स्थानीय स्तरमै उत्पादन भएका सामग्रीको उपभोग बढाउने र बिचौलिया घटाउने अपेक्षा गरिएको छ।
स्थानीय सहभागिताका लागि आग्रह:
नगरपालिकाले सर्वसाधारणलाई मेलामा सहभागी भई: स्थानीय उत्पादन प्रयोग गर्न, महिला उद्यमीलाई सहयोग गर्न र स्थानीय अर्थतन्त्र सुदृढ बनाउन आह्वान गरेको छ।
