“नेपालको समृद्ध संस्कृति र उज्बेकिस्तानसँगको मैत्रीपूर्ण सम्बन्धलाई प्रवर्द्धन गर्दै सांस्कृतिक कार्यक्रम, परम्परागत प्रस्तुती र नेपाली खानाको विशेष प्रदर्शनी”
बुकारा, उज्बेकिस्तान – एशिया इन्टरनेसनल युनिभर्सिटी (AIU), बुकारामा आयोजित नेपाल फेस्टिवल २०२५ मा नेपालको सांस्कृतिक विविधता र उज्बेकिस्तानसँगको मैत्रीपूर्ण सम्बन्धलाई उजागर गरिएको छ।
कार्यक्रममा नेपाली र उज्बेक अतिथिहरूको उपस्थितिले कार्यक्रमलाई विशेष सम्मान प्रदान गर्यो। कार्यक्रममा नेपालका सांस्कृतिक नृत्य, परम्परागत प्रस्तुती, र नेपाली खानाका स्वादिष्ट परिकारहरू समावेश थिए, जसले उपस्थित दर्शकहरूलाई नेपालको सांस्कृतिक विविधता र परम्परागत जीवनशैलीको राम्रो परिचय दिएको थियो।
नेपालकी पाकिस्तान स्थित राजदूत तथा उज्बेकिस्तानका गैर-निवासी राजदूत, माननीय रिता धितालको प्रमुख आतिथ्यमा सम्पन्न कार्यक्रममा उप-राजदूत पुरुषोत्तम ढुङ्गेल, उज्बेकिस्तानबाट पहिलो पटक नेपाल मार्गबाट सगरमाथा आरोहण गर्ने सर्गेई देनिसेन्को, उज्बेकिस्तानको पर्यटन बोर्डका विशिष्ट प्रतिनिधि, बुकारा मेयर कार्यालयका प्रतिनिधि, र खेलकुद मन्त्रालयका प्रतिनिधिहरुको उपस्थिति रहेको थियो।
कार्यक्रममा नेपाली परम्परागत नृत्य, सांगीतिक प्रस्तुती, र विभिन्न सांस्कृतिक गतिविधिहरू प्रस्तुत गरियो। साथै, सहभागीहरूले नेपाली खानाका विशेष परिकारहरूको अनुभव गरिरहेका थिए ।
AIU का प्रशासन, संकाय सदस्य र नेपाली विद्यार्थीहरूले एकत्रित भएर आयोजना गरेको यस उत्सवले नेपाल–उज्बेकिस्तानबीचको जनस्तरमैत्री सम्बन्ध अझ बलियो बनाउने उद्देश्य राखेको एशिया इन्टरनेसनल युनिभर्सिटी (AIU) का डीन डा किशान भण्डारीले बताउनुभयो ।
कार्यक्रमको समापनमा सबै उपस्थित अतिथिहरूले नेपाल–उज्बेक सम्बन्ध र सांस्कृतिक आदान–प्रदानको महत्वमा जोड दिनु भएको थियो।
